MNF-in dan bawhchhe char charah ZPM (independent) MLA-te an puh

MNF general secretary (Media & Publicity) VL Krosshnehzova chuan October 14, Inrinni khan Aizawl Prwess Club-ah thuthar thehdarhtute a kâwm a; ZPM (independent) MLA pangate tun hnaia MLA aṭanga an báng chuan hun rei tak dan an bawhchhiat char charzia a nem nghet niin a sawi.

VL Krosshnehzova chuan, kum 2018 inthlanah páwl thar Zoram People Movement (ZPM)-te'n party politics chu ramin a chhiatpui tia tlangau chung leh 'Party kan ni lo, Movement kan ni, mipui pawl kan ni' ti chungin inthlan an hmachhawn a, an candidate-te'n independent vekin nomination an thehlut tih a sawi a, "An zinga mi pasarih tlingin, seat pariat an la a ni," a ti.

ZPM chu political party a ni zui a, ECI-in a ziah luh pawh July 23, 2019-ah an lawm tih sawiin Krosshnehzova chuan, "An inzawrhna ‘party ni lo’ tih chu uiresanin party an lo nih san ta," a ti a, chuti chung chuan ZPM MLA-te chu party thar ZPM-ah chuan a kúl atáiah ṭangin, a che vel berah an ṭang zui zel niin a sawi.

MNF GS chuan, independent MLA pangate chu dan palzútah puhin, "ZPM party MLA ang maiin an khawsa zui a, hamṭhatna an chuh theih zawng zawng an hman zawh hnuah, an nihna dik zêp theih loh chu puang chhuakin, party candidate an nih theihna turin an MLA nihna chu October 10, 2023 khan an bànsan ta. An bànna pawh dan ang thlapin Speaker-in a pawm zui ta," a ti.

MLA aṭang Lalduhoma bàn a nih hnuah amah hêktu MNF MLA-te chu a chhe thei ang berin ZPM party-in an chuk zui nia sawiin Krosshnehzova chuan, "Huaisen taka dan ṭana ding MNF MLA 12-te dinna kha thu dik a nihzia leh dan bawhchhetu zawk chu kha tih laia independent MLA Lalduhoma a nihzia, independent MLA pangate bànna thehluh hian a pho lang chiang hle," a ti a; ZPM party lakah fimkhur turin mipui a chah a ni.