Expenditure observer-te'n an chan district-a sorkar official-te an kâwm

November 7, 2023-a Mizoram Legislative Assembly inthlanpui neih tura sum hman dan endiktu, expenditure observer hrang hrangte chuan October 14, Inrinni khan an chan district ṭheuhah sorkar (election) official-te an kâwm a; hmalak dan tur leh thil tih dan turte an sawipui.

Aizawl district-a constituency-te enkawltu expenditure observer pahnih Nayanjyothi Nath leh Ajit Dan te chuan DC Conference Hall leh State Guest House-ah Election official-te an kâwm a; team hrang hrangte chu an hna inkungkaih dan leh inthlanna muanawm leh felfai, dan palzûtna awm lo siam tura an chanvo ṭheuhah rinawm taka thawk turin an chah.

Lungleiah chuan DRDO conference hall-ah Lunglei district expenditur observer Chandan Datta hoin an ṭhukhawm a, Chandan Datta chuan, "Inthlanna laia party leh candidate-te senso phal zat bituk a nih avangin candidate ṭhenkhat chuan an senso thup ṭhen an tum mai thei. Chuvangin, team hrang hrangte'n uluk taka party leh candidate-te senso in vil a ngai dawn a ni," a ti.

Siahaah chuan expenditure observer Dev Prakash Bhamavanat hoin DC conference room-ah an ṭhukhawm a; ECI-in sum hman phal zat a siam thu sawiin Bhamavanat chuan, "Candidate pakhat tan cheng nuai 28 han phal tih hi a taka kalpui a ṭul. ECI-in a tum ber chu induhsak bikna awm lo leh intluk tlang taka candidate leh political party-te'n inthlan an hmachhawn hi a ni," a ti a, ṭan la turin team-te a chah.

Serchhip district-a MLA bial pathum vil tura ruat expenditure observer Umesh Chandrakant Phade chuan DC conference hall-ah inthlan kaihhnawih team a kâwm a, "ECI chuan campaign-na atan sum sensote uluk taka vil zui turin team hrang hrang a din a, team-te chuan an hna uluk leh taima takin an thawk tur a ni. Mahni hna pawlawh taka thawk an awm a nih chuan an chungah action lâk a ni ang," a ti.

Mamitah chuan expenditure observer Dr Sunil N Ranote hoin DC conference hall-ah official-te an ṭhukhawm a; Observer chuan, team hrang hrangte chu ECI inkaihhruaina chhiar chiang a, an mawhphurhna bakah, thawhhona ṭha an neih theih nan digital media platform hmang ṭangkai turin a chah.

Khawzawl district expenditure observer Sridhar Dora chuan DC meeting room-ah inthlan kaihhnawih team hrang hrangte a kâwm a, an mawhphurhna ṭheuhte ṭha taka hlen chhuak turin a chah a ni.