Congress kan sorkar chuan Bairabi HEP tihhlawhtlin kan tum ang - Lalsawta

MPCC, PC leh ZNP-te telna Mizoram Secular Alliance (MSA) hruaitute chuan October 14, Inrinni khan Brig. T Sailo chief minister a nih laia Bairabi Hydel Project atana Tlawng lui khuah tumna hmun an tlawh a; MPCC president Lalsawta chuan, Congress party an sorkar chuan Bairabi Hydel Project tihhlawhtlin an tum thu a sawi.

Lalsawta chuan, "MSA-a kan thawhpui PC party rilrua thi thei lo, ram rotling tur Bairabi Hydel Project hi Congress party kan sorkar a nih chuan tihhlawhtlin kan tum ang... Pu Ṭhena khan Mizoram tan nasa takin ngaihtuahna a séng a, mi ropui tak, hruaitu ṭha a ni. Hmathlir a nei thuiin ṭhahnem a lo ngai em em a, a hmalakna tam tak hi chhunzawm tlak a ni," a ti.

Sorkar laipuia Congress an sorkar laiin kohhrante'n ram dang aṭangin ṭanpuina an dawng thei ṭhin tih sawiin Lalsawta chuan, "BJP sorkar hian chu foreign funding dawn theihna dan FCRA a titawp a, kohhran leh kohhran enkawl hospital-te'n an tuar hle a ni," a ti a; kohhrante'n foreign funding an dawn leh theih nan sorkar laipuia BJP chakna tihtawp a ngaih thu leh Mizoramah pawh BJP leh an thawhpuite hneh ngei ngei a ngaih thu a sawi.

MPCC President chuan, Mizo ram leh hnam chhan a ngai nia sawiin, "Sum leh therhlo thil tih theihna kan hnâwl a ngai. Sum hmanga lei theih kan nih chuan kan ram hma lam hun a thim hle dawn a, ngaihtuah ngam pawh a ni lo," a ti.

PC party president Vanlalruata pawhin thu sawiin, "ZPM-te'n PC sorkar laia hma an lakna ṭhenkhat la puitling lo tihhlawhtlin kan tum an ti a, chumi an sawiah chuan Bairabi Hydel Project a tel lo," a ti a; PC party chuan Bairabi Hydel Project chu an ngaih pawimawh ber a nih thu a sawi.