Seat insemin party dangte thawhpui kan tum lo - Sapdanga

ZPM working president K Sapdanga chuan October 14, Inrinni khan Aizawl North-III biala Edenthar Venga ZPM information office a hawnnaah thu sawiin, Mizoram inthlanpuiah seat insemin party dangte thawhpui an tum loh thu a sawi.

Aizawl North-III biala ZPM candidate tur K Sapdanga chuan, "MLA inthlan lo awm turah hian ZPM party-in seat insemin party dang thawhpui neih a tum lo a, party mala sorkar siam turin theihtawp a chhuah mek a ni," a ti.

K Sapdanga chuan, "Kan khingpui party dangte hian kan party awm dan tur hi suangtuahnain min rèlpui nasa hle mai a, an election manifesto chu ZPM candidate-te sawi bawrhbàn a ni ta ber mai. ZPM hian Pathian leh mipui zarah hnehna a chan chuan, corruption hi sorkar lairil aṭangin a do ang," a ti a; hmasawnna hna chu ramri hrúl aṭang te, véng daifém aṭangtein an thawh ṭan dawn thu a sawi bawk.