ZPM-ah kalphung thar a takin a lang mek zel - Zonu President

ZPM Zonu president R Lalawmpuii, AMC councillor chuan, politics chu Pathian thu nena kal ṭhiang tlak khawpa thianghlimin buaipui tur a ni, tih chu ZPM party ngaihdan a nih thu leh ZPM-ah kalphung thar a taka a lan mek zel thu a sawi.

AMC councillor R Lalawmpuii hian October 13, 2023 khan Tuikum khuaa Zonu intuaitharna leh campaign hawnna a hmanpuinaah thu sawiin, political party leh kohhran chu kal kawp tur a nih thu a sawi a, "ZPM chuan politics hi Pathian thu nena kal ṭhiang tlak khawpa thianghlimin kan buaipui tur a ni. Mi ṭhenkhat chuan sakhuanaa an tih duh loh hi politics-ah tih an tum ṭhin avangin sakhuana leh politics sawi hran an tum mek a ni," a ti.

R Lalawmpuii chuan, "ZPM-ah kalphung thar a taka hmuh zel a ni. ZPM AMC corporator-te leh MLA-te ward fund hmannaah kalphung thar a taka hman a ni a, hei hian party dangteah chona a siam a ni," a ti a; ZPM chu politics-a thil ṭha chíng chhuaktu an nih thu a sawi bawk.