Airport aṭanga haw turte zawm tur siam

Chief secretary Lalnunmawia Chuau­ngo chuan, naktuk Thawhlehni aṭanga thlawhtheihna hmanga Lengpui Airport kal­tlanga Mizorama lut turte zawm tur a tichhuak.

Chief Secretary tarlan danin, Home department aṭanga phalna la hmasa loin Lengpui Airport pan tur thlawhnaah chuan phal a ni lo a, an awm mekna khuaa Mizoram sorkar aiawh - resident commissioner, joint resident commissioner leh deputy resident commissioner-te hnenah an flight leh ticket neih dan kimchang hriattir tur a ni. Mizoram House awm lohnaah chuan an hnaih ber Mizo welfare hruaitute hnenah inhriattir tur a ni thung. 

Home department aṭanga phalna la hmasa lote chu Lengpui Airport an thleng a nih pawhin, airport aṭanga an chhuah phal a ni dawn lo a; thu dik lo thehlut emaw, zêp emaw an awm a nih chuan hrem theih an ni.

•    An awmna hmuna Mizoram sorkar aiawh - RC, JRC, DRC-te hnenah an thlawhna leh ticket chanchin kimchang takin an hriattir tur a ni.

•    State/khawpuia Mizoram sorkar aiawh (Mizoram House) awm lohnaah chuan an hnaih ber Mizo welfare-te hnenah an inhriattir tur a ni a, chanchin chiang tak thehluh tur. Thu dik lo thehlut emaw, zêp emaw an awm chuan hrem theih an ni.

•    Mizoram Home department aṭanga phalna la hmasa loin Lengpui Airport pan tur thlawhnaah chuan phal a ni lo a, Lengpui Airport chhuahsan phal a ni lo bawk.

•    Passenger list kimchang Task Group on Migrant Workers & Stranded Travellers Chairman hnenah thawn a ni ang a, flight thleng tur apiang list kimchang siamin, passenger-te thlen chin tur district tarlang telin Home department pawmpui turin thlawhna thlawh chhuah ní (date of departure) tlai dar 2 hmain thehluh ṭhin tur.

•    Lengpui Airport-a thleng apiangte chu Covid-19 symptom an neih leh neih loh endik (screen) tur a ni a, a ṭul angin rapid antibody test (RAT) emaw, state sorkarin a bituk ang zela endik ṭhin a ni ang.

•    Ministry of Health & Family Welfare-in red zone-a a puan ram/khua aṭanga lo thlengte chu Lengpui Airport-ah RAT hmanga endik tur a ni a, an inkhung hranna hmunah RT-PCR test tih vek tur a ni bawk.

•    Lengpui Airport-a thlawhna hmanga lut zawng zawngte an awmna DC-te hmun ruatah ni 14 an in­khung tur a ni.

•    DC-te'n ruahmanna an siamsak lirthei hmangin quarantine facility an pan tur a ni a, DC-in a phalsak a nih loh chuan airport-a inlamna tur dang siam phal a ni lo.

•    A chunga tarlante bakah, Mizoram sorkarin SOP a siam te, Ministry of Civil Aviation-in (www.civilaviation.gov.in) hriattirna a tihchhuahte an zawm tur a ni. Thlawhna thlawh chhuah hma pre-departure guideline a siam angin passenger-te'n Aarogya Setu mobile apps emaw, form siamah an hriselna dinhmun chiang takin an tarlang tur a ni.