Tuialhtheiah chhiah tisang dawn

May 22, Zirtawpnia Council of Minister ṭhukhawm chuan, tuialhthei (petrol leh diesel)-a chhiah lâk tihsan a remti. Chhiah hi diesel-ah 12% aṭangin 14.5%-ah leh petrol-ah 20% aṭangin 25%-ah tihsan tur a ni a, June 1, 2020-ah hman ṭan a ni ang.

Chief Minister-in Inrinnia thuthar thehdarhtute a kawmnaah Taxation minister Lalchamliana chuan, tuialhthei aṭanga chhiah lâk tihpun a nih dan a sawifiah a ni.

Lalchamliana chuan, Covid-19 avangin India ram mai ni lo, ram chang­kang zawkte pawh an economy nasa takin a khawih tih sawiin, "Mizoramah pawh inkhàrkhip vangin sumdawng tam takte'n dawr an khâr a ngaih avangin bungrua an hralh thei lo a, state sorkara chhiah lut tur nasa takin a tlakhniam phah a ni. Chutih laiin, hri léng dona atan sum leh pai ṭhahnem tak mamawh a ni," a ti.

Goods & Service Tax (GST) hnuah state sorkar thuneihna liau liaua rate tihdanglam theih chu VAT hnuaiah a nih thu sawiin Taxation Minister chuan, "VAT hnuaiah hian zu leh tuialhtheiah chiah chhiah lâk a ni," a ti a; Mizoram chu dry state a nih angin zu chhiah lak a ni lo a, petroleum lamah chiah VAT lak a nih thu a sawi.

Taxation Minister sawi danin, chhiah (VAT) chu diesel-ah 12% aṭangin 14.5% leh petrol-ah 20% aṭangin 25%-ah tihsan tur a ni. Diesel litre khat man Rs. 60.49 ni ṭhin chu Rs. 63 a ni dawn a, petrol litre khat man Rs. 66.54 ni ṭhin chu Rs. 69.87 a ni ang.

Covid-19 avangin Nagaland, Assam leh Meghalaya-ahte tuialhtheia chhiah lak tihsan a ni tawh. Mizoram sorkarin chhiah lak a tihsan hnu pawh hian hmarchhakah chuan Arunachal Pradesh tiam lohin Mizoram chu tuialhthei tlàwmna ber dawttu a ni. State dang chuan VAT bakah, surcharge leh cess chi hrang hrang an la tel nual a ni.