ZMC-ah swab sample ni khatah 100 vel a endik theih tawh dawn

Health & Family Welfare minister Dr R Lalthangliana chuan, Covid-19 kai nia rinhlelhte RT-PCR hmangin swab sample ni tin 100 vel endik theih turin Zoram Medical College (ZMC)-a Covid-19 Testing Laboratory tihchangtlun a nih thu a sawi.

Dr R Lalthangliana hian May 23, Inrinni khan Lengpui Airport-a khawsik enna Thermal & Optical Bi-Spectrum bun thar a enfiah a; thu sawiin, "State páwn Covid-19 hluarna aṭangtein kan unaute an rawn haw zel a, chuvangin, Covid-19 kai nia rinhlelhte swab sample endik zung zung theih a ngai. Mithiamte nen inràwn tlan a nih hnuah ZMC-a Covid-19 Testing Laboratory chuan pooled sampling technique a hmang tawh dawn a, kar leh aṭangin ni tin sample 100 vel a bul ṭan nan test phawt tum a ni," a ti.

Health Minister chuan, Thermal & Optical Bi-Spectrum chu Lengpui Airport-a dah a nih hmain Delhi, Bangalore leh Thiruvananthapuram airport-ahte chiah dah a la nih thu sawiin, "Hetiang kháwl dah thei airport palina kan ni hi a ropui hle. Covid-19 laka kan invènna kawnga hmanraw pawimawh tak a ni a, khualzin lo lut apiang khawsik an neih leh neih loh awlsam leh rang takin kan test zel thei tawh dawn," a ti a; rinhlelh an awm pawhin sample lakna tur airport-ah peih a nih tawh thu a sawi.

Health Minister hian Lengpui Airport leh Lengpui damdawi-in (PHC) tan hmai tuamna 500 ve ve, kutkawr 500 ve ve, hand sanitiser litre 20 ve ve, N95 mask 100 ve ve, PPE 100 ve ve leh rapid antibody test kit 100 ve ve a pe a ni.

Sorkar thuchhuah tarlan danin, hmarchhak state zingah Mizoram chu Thermal & Optical Bi-spectrum Camera nei hmasa ber a ni. Hemi hmang hian meter hnih danah khawsik leh khawsik loh a en theih a, a rualin mi 10 endik theih a ni. Thermal camera-in a lak data leh ID chu email leh whatsapp hmangin Covid-19 lam buaipuitute thawn nghal zel theih a ni ang.