KHAWTHLIR

State Disaster Management Authority hnuaia State Executive Committee chairman Lalnunmawia Chuaungo, chief secretary chuan Mizorama inkhàrkhip thawh lina inkaihhruaina ṭhenkhat tihdanglam a nih thu a puang. Hriattirnaa a lan danin, AMC huam chhung leh district headquarters bika dawr hawn phal zinga dah tawh, mall chu paih a ni a, hawn phal a ni tawh dawn lo. Zan lama curfew hun - zan dar 7 aṭanga zing dar 7 chu tihsei niin, curfew tàwp hun chu zing dar 7 a ni tawh ang.

May 23, Inrinni khan Zonuam Bial KṬP-te'n an bial KṬP kum 10 tlin pualin Synod Hospital-ah thisen unit 48 an pe a, petute mipa 37 leh hmeichhia 11 an ni. Aizawl Civil Hospital-ah pawh Armed Veng Branch KṬP-te'n thisen unit 34 an pe a, petute mipa 31 leh hmeichhia pathum an ni a; Upper Republic Branch KṬP pawhin unit 27 an pe a, petute mipa 20 leh hmeichhia pasarih an ni. 

Lalruatzela (52), Saitual Chawnpui Veng chuan a nupui hlui Lal­ṭhatluangi (52), Saitual Chawnpui Veng tho chu nimin khan a vit hlum. Saitual police-te aṭanga thu dawn danin, Lalṭhatluangi hi an in bula a ṭhiannuin a sam ṭuak a pawhsak laiin nimin chawhma dar 11:45 vel khan Lalruatzela'n a vit a, damdawi-in thlenpui a nih hnuah, a hliam tuar loin chawhnu dar 1:15 velah a thi. Lalruatzela hi police-in an man tawh a, Aizawlah lak tur a ni.

Mamit district-a sorkar quarantine centre-ah May 23, Inrinni thleng khan mi 94 an awm a, mipa 63 leh hmei­chhia 31 an ni. SSA boys hostel-ah mi 18, Tourist Lodge-ah mi 32, Polytechnic-ah mi 20, BDO Rest House, Zawlnuam­ah mi pasarih leh West Phaileng H/S-ah mi 17 an awm mek a ni.

Mizoram Bharat Scouts & Guides-a State Council member leh unit leader te, Rovers & Rangers leh Scouts & Guides-te chuan May 23, Inrinni khan Aizawl khawpuia chawhmeh zawrhna hmun 10-a chawhmeh zuarte hnenah hmai tuamna 1,000 an sem.