MNYF-in mipui sawisaah sorkar an puh

MNF ṭhalai hruaitute nimina ṭhukhawm chuan resolution siamin, Mizoram sorkar chu mipui sawisaah an puh a, "Mipui an sawisak dan leh hnathawh dante kan ngaihtuahin lungawi har kan ti," an ti.

MNYF resolution chuan, sor-karin lirtheia lifetime tax (kum 15 atan) an pek tur zat chhûtna atan motor man aṭanga 6% a bithliah chu mipui sum hmanga NLUP tuaknaa an ngaih thu a tarlang a, "Hmarchhak state dangte pawhin percent hniama an lak mek laia uchuak taka tax an tihsan belh leh vak mai hi kan dem tak zet a ni," a ti.

MNYF chuan, chhungkaw tam takin eizawn nan hmunphiah an chìn lai a, NLUP kaltlanga hmunphiah chíngte chauh chhiah (royalty) awltir a nih chu an dem thu sawiin, "Mi dang hmunphiah chíngtu harsa tak takte aṭanga chhiah a la bik hi party inthliarna leh induhsaknaah kan ngai," an ti a; hmunphiah chíngtu zawng zawngte chu ang khata en turin sorkar an phût.

Khaw ṭhenkhat kudama buhfai a awm loh chhan chhuanlama Supply minister John Rotluangliana’n 'sazu' a mawhpuh nia sawiin, thil âwm lo leh nuihzatthlak tak nia an hriat thu an sawi a; Mizoram sorkarin Lengpui Airport, Indian Airforce (IAF) kuta hlan tuma hmalakna a chawlhsan ta chu lawmawm a tih thu an sawi thung.