Kawng siam vangin lirthei tlân dan tidanglam

Traffic SP C Lalthanmawia chuan thu-chhuah siamin, Hunthar Venga lei tlahniam chu zanin aṭangin zan dar 8 leh a tûk zing dar 6 inkarah thawm ṭhat hna thawh ṭhin a nih dawn avangin lirthei tlan dan turah rua-hmanna a siam.

Traffic SP chuan thuchhuah dang siamin, Kawnpui-Durtlang kawng siam mekah chak zawka hnathawh a nih theihna atan kawng siam chhung chu Sairang lam kawng, NH-54 lama kal hram hram turin mipuite a ngen bawk.

Traffic SP chuan, "Loh theih lohna vanga hnathawh hun chhung, zing dar 8 aṭanga tlai dar 4 inkara Kawnpui-Durtlang kawng kaltlang turte chuan kawng siamtute tibuai lo thei ang berin, hna thawktute remtih hun nghah zel tur a ni," a ti. Thuchhuah hi March 31, 2016 thleng atana tih a ni.

Lirthei tlan dan tura ruahman

* Lirthei tê chi (LMV)-te tan Aizawl aṭanga Sairang/Lengpui zan lama pan tur emaw, Sairang/Lengpui aṭanga zan lama Aizawl rawn pan tur zan dar 8 hmaa Hunthar leit lahniam paltlang hman lote chu Sakawrtuichhun-Lungverh road-ah kal tur a ni.

* Lirthei lian (HMV) leh lirthei laihawl (MMV)-te chu zan dar 8 aṭanga a tûk zing dar 6 inkarah Sakawrtuichhun-Lungverh road-ah kal phal a ni lo.

* HMV leh MMV, Aizawl lam pante chuan zan dar 8 hma ngeiin Hunthar Veng lei tlahniam an pêl hman tur a ni a, tlan pel hman lote chuan Ch. Saprawnga Truck Terminal, Rangvamualah Aizawla an tlân luh theih hun an nghak tur a ni.

* Thupek hian hna thawh zawh a nih hma chu a huam dawn a, chhiatrupna thil, kângmei leh emergency kaihhnawiha duty leh dan leh thupek pawimawh bika duty-te a huam lo ang.