Ram tikang lo turin CM-in mipuite a chah

Mizoram puma kângmei chhuak thei laka invenna hapta vawiina hman ṭan tur pualin, chief minister Lal Thanhawla chuan mipuite thu a chah a; ram tikâng lo tura theihtawp chhuah ṭheuh turin Mizo mipui a sáwm.

Chief Minister chuan, pipute aṭang tawha hun pawimawh deuh Mizoin kan neih chu lo vah leh hâl hun a nih thu sawiin, "Lo hâl hun kan lo thleng leh dawn ta a, mi tinte kan vah bak ram tikâng lo turin kan inchah leh a ni. Ram lama hnathawk ṭhin kan nih avangin lo vah leh hâlte hi hunbi nei, kan nuna bet tlat a ni kan ti lo thei lo ang," a ti.

Mizote'n kum tin lo neiin, hâwpkhawp tharchhuah ngei an tum ṭhin tih sawiin Lal Thanhawla chuan, "Lo hâl hun pawh uluk tak leh fimkhur takin kan ruat
ṭhin. Tun hnu hian lo hâl hunbi mumal tak kan nei tawh lo a, hei hian nasa takin ram a tikâng thin nite pawhin a hriat," a ti a; fimkhur tâwk loh vang leh sorkarin lo hâl hun a bituk zawm loh vangin vah bak ram a kâng chiam ṭhin niin a sawi.

Chief Minister chuan, "Khawvel sik leh sa danglam chak lutuk tihnêp nana ramngaw ṭha a pawimawhzia kan hriat belh zel a, ramngaw siam leh humhalh hna pawh kan uar sauh sauh a ṭul tak zet tawh. Ramngaw aṭangin thil nung tinreng-in kan mamawh boruak ṭha te, ei tur chaw leh tui in tur te, chenna turte kan dawng a ni," a ti.

Kumina ram kâng venna thupui, ‘Ram tikangtu chu ram hmelma a ni’ tih chu thu dik a ni tih sawiin Lal Thanhawla chuan, "Naupang aṭanga pui-tling, a hmei a pain kan mawh-phurhna vek a ni," a ti.