KHAWTHLIR

Assembly session

Governor Lt.Gen. Nirbhay Sharma chuan Mizoram State Legislative Assembly pasarihna ṭhutkhawm ṭum riatna chu March 15, 2016 chawhma dar 10:30-a
ṭan turin a ko. Session programme kimchang tur chu Assembly Business Advisory Committee-in a la rel ang.

Lungleiah Kut

Lunglei DC Abhijit Vijay Chaudhuri hoin nimin khan DC conference hall-ah Chapchar Kût 2016 atan Organising Committee din a ni. Meeting chuan, kût hmanna atan Ṭhuamluaia Mual dil an rel a; Kût Pa atan minister Zodintluanga sáwm an tum bawk.

Thingin vaw hlum

February 8, 2016 chhun dar 1 vel khan Ralkapthanga, Buarpui, Lunglei district chu an thing kihin a vua a, damdawi-in panpui a nih laiin Thawh
ṭanni zan dar 11:30 vel khan a thin. Ralkapthanga hi kohhran hnatlangah an tel a, biak-in bula thingkung kih an tumna lamah an thing kih
chuan a vaw palh a ni.

Dah phal lo

Traffic SP chuan thupek chhuahin, PWD-te'n zanin dar 9 aṭangin khawvar thleng Bazar Bungkawn - Sikulpuikawn leh Sikulpuikawn - Canteen Kual via Khatla kâwn inkar kawngpui thawm ṭhat hna (resurfacing) an thawh dawn avangin, hemi huam chhungah hian lirthei dah phal a ni lo tih a tarlang.

Award lawmpui

Huaisen chawimawina, 'The Bapu Gaidhani Award' dawngtu Ramdinthara (17), Saiha hnenah nimin khan MADC chief executive member RT Zachono-a'n lawmpuina thuchei leh pawisa a hlan. 'The Bapu Gaidhani Award' hi National Bravery Award category panga zinga a palina a ni.

Industry campaign

Ministry of Small and Medium Enterprise (MSME), Aizawl branch chuan nimin khan T Romana College-ah Industrial Motivation Campaign an buatsaih a, zirlaite thil pawimawh hrang hrang an zirtir.