Zika virus lungkham lo turin chah

Natna hri darh mek Zika virus chungchangah Health department chuan thuchhuah a siam a; tun dinhmunah Zika virus hian India ram a la thlen loh avangin Mizoram mipuite tan lungkham vak a ṭul rih loh thu a tarlang.

Health department tarlan danin, Zika virus hi natna chi khat, Zika virus paitu Aedes thosiin mi a seh aṭanga kai leh darh a ni a, Aedes thosi hian natna dang, Dengue leh Chikunggunya te pawh a thlen ṭhin. Zika virus natna hi Uganda ramah kum 1947-ah hmuhchhuah niin, kum 2014 aṭangin South America khawmualpui a thleng a ni.

WHO chuan America khawmualpuia ram 22-ah Zika virus a awm thu a puang tawh a, khawvel hmun hrang hranga a darh zel veng tur leh ram dangte'n a theih anga hma an lo lak theih nan February 1, 2016 khan WHO chuan emergency a puang. He natna hian nausen lu ṭhan a tiṭhu thei a, thluak lama piansualna a thlen thei bawk a; mahse, a kai zinga 80% velah chuan a lang chhuak lo a, thih phah leh damdawi-ina luh ngai khawpa ná pawh an tam lo.

Zika natna hi India ramah hmuh la ni lo mah se, sorkar laipuia Health & Family Welfare ministry chuan India ram a thlen palha hmalak dan tur a duang vek tawh a ni.

Health department thuchhuah chuan, Zika virus-in India ram a la thlen loh avang hian Mizoram sorkar tan lo busipui ngawt theih a ni rih lo tih an tarlang a, "A ṭul anga hma la tur erawh chuan department kan inkau reng a ni," an ti.