Kawngpui kama thingkung sah rêk a ni Insawifiah turin Mamit DHO hriattir
Kawrthah ram chhung, Tuidam khua nena an inkar kawngpui kama thing ding ṭhenkhat chu sah rêk kual a ni. Hemi chungchangah hian Kawrthaha Divisional Forest Officer (DFO) chuan Tuidama Mamit district horticulture officer (DHO) T Vanlal-tlana chu insawifiah turin a hriattir.
Thu dawn danin, Kawrthah leh Tuidam inkar, Kawrthah khua aṭanga km. 5 vela hlaa thing puitling tawh paruk chu thûk ang reng takin sah rêk kual a ni a, a thih theihna tura tih nia hriat a ni. Thingte chu kum 1986-1987 vela phun tawh, kum 34 vela upate a ni hlawm. Thing an sah rêkte chu - Neem (Azadirachta indica), Lenhmui (Syzygium cumini), Thingpawnchhia (Glodidium velitinum) leh Tei (Toona ciliate)-te a ni.
Hemi chungchangah hian Kawrthah Chhimveng leh Hmarveng branch YMA-te chuan Kawrthah DFO hnenah pawi khawihtu man chhuak a, hrem ngei tura ngenna an thlen a; DFO pawhin hma la nghalin, a mawhphurtu nia sawi T Vanlaltlana, DHO, Mamit district, Tuidam hnenah May 19, 2020 khan insawifiah turin lehkha a pe a; a thil tih chu dan bawhchhiatna pawi tak, The Mizoram (Forests) Act, 1955 hnuaia hrem theih a nih thu a hriattir a ni.
Thingte hi nimin khan Kawrthah YMA, DFO leh a thawhpuite'n tuam dam leh theih a nih beiseiin kawlawm ang deuhin an tuam a ni.
Kawngpui kama thing puitling tawh paruk tihhlum tum chungchangah hian Green Mizoram Network (GMN) leh Association for Environmental Preservation (ASEP)-te chuan thuchhuah siamin, an dem thu leh a titute hrem ngei an duh thu an tarlang.
GMN chuan, thing puitling tawh paruk tihhlum tuma kutthlak a ni chu an ngai thu tak hle tih sawiin, "A ṭul ang leh dan anga chak taka hma la turin Mizoram sorkar thuneitute kan ngen. Heng thing puitling, kum 30 chuang zeta upa tihchhiat hù hi phun leh ngei a nih theih nana hma la turin a mawhphurtu hi kan phût bawk a ni," an ti.
ASEP pawhin pawi an tih thu tarlangin, "A bul tumtu hi Pu T Vanlalthlana, DHO niin a lang a, an huan a dîp deuh nia hriain hetiang thil hi a pawina ngaihtuah loin a ti ta mai niin a lang," an ti a; T Vanlalthlana chu Kawrthah DFO hnenah kal nghalin, ngaihdam a dil a, thuneitu lamte'n a ṭul dan angin hma an la tura an ngaih thu an sawi.