3rd. IR hmun sakna tur lungphùm Home Minister Lalzirliana'n a phúm

Lawngtlai bul, Thingkah khaw kianga 3rd IR police battalion headquarters sakna tur lungphùm chu nimin khan Home minister R Lalzirliana'n a phúm.

R Lalzirliana chuan, chhim lam chu Mizoram chhuahka pawimawh ber la ni mai tur a nih thu sawiin, "Tunah pawh KMMTTP kawngpuiin Lawngtlai district a paltlang ruah tawh a. Hei vang hian venhimna lamah pawh hma thar lak ve a ngai. Sorkarin Thingkahah police battalion hmunpui tur a ruahman ta a ni," a ti.

Mizoram police-te'n kawng hrang hrangin vantlang tan hna an thawk reng tih sawiin Home Minister chuan, "Chhiattawhna kawng tinrenga chhanchhuahna hna te, ruihhlo leh sualna dang ven kawngah te, kângmei ven leh tuitla zawn kawngahte hma an la a, English medium school-te hial an din ṭhin," a ti a; police-te hnathawh chu Thingkah khaw mipuite'n an chhawr tur thu a sawi.

Parliamentary secretary (Home) Lt.Col. ZS Zuala pawhin thu sawi-in, "Police hmunpui thar tur sak hnathawh kan ṭan dawn a, hnathawktute'n belhchian ngam leh rin ngama hna an thawh kan duh. Lirnghing leh leimin ṭhinna rama cheng kan nih avangin chu'ng chhiatna thleng thei chite laka him thei ang ber zela hna min thawhsak turin kan duh a ni," a ti.

3rd IR Bn. headquarters hmunhmate siamna tur hian Ministry of DoNER aṭangin cheng nuai 2842.28 hmuh a ni a, chu'ng zinga cheng nuai 1023.22 chu pek chhuah tawh niin, thla 36 chhunga thawh zawh tur a ni.

Lungphùm phùmnaah hian minister C Ngunlianchunga, parliamentary secretary H Zothangliana, IGP Zorammawia, Lawngtlai DC J Hmingthanmawia, Lunglei SP Zosangliana, Lawngtlai SP Lalsanglura leh Fire & Emergency director Neihchungnunga te pawh an tel.