Rúlhût Dona Ni hman a ni

Rashtrya Bal Swastrya Karyakram (RBSK), Rashtrya Kishor Swartrya Karyakrams (RKSK) leh National Health Mission (NHM) ṭangkawp chuan nimin khan National De-Worming Day an hmang a, Health minister Lal Thanzara'n Chanmari YMA Hall-ah a hmanpui. Day pualin naupang ṭhahnem tak hnenah rûlhût hlo pek a ni.

Health Minister chuan, rúlhût dona ni hman a nih chhan sawiin, "India rama awm kan nih avangin he programme hian min hrût ve a. Hmasawnna hrang kawngpui
ṭha, power, electronic hmanraw hrang hrang leh thil dangahte hma sawn mah ila, a mi chengte kan hrisel loh chuan awmzia a nei thei dawn lo. Kan hriselna tur hi kan ngaih pawimawh a ṭul," a ti.

Rúlhûtin natna hrang hrang - thisen tlâk-chhamna (anaemia), chaw ei châk lohna, taksa chau leh hlauhthawnna, pum ná, luak leh kaw-
ṭhalote a thlen theih tih sawiin Lal Thanzara chuan, "Ram hrisel leh naupang hrisel kan neih theihna turin hriselna atana mithiamte'n an sawi anga rúlhût damdawi Albendazole ei a pawimawh," a ti a; rúlhût pâi avangin naupang ṭhan a ṭhu a, an rilru leh thluak ngaihtuahna a tihhniam theih tih a sawi.

NHM mission director Dr. K Lalbiakzuala chuan India sorkarin hriselna chawi sang tura hma a lak dan a sawi a, "Hriselna ngaih pawimawh loh vanga awm mai mai hian thihna a thlen thei a, hei hi pumpelha ven theih a ni. Rúlhût chi hrang hrangte hi kan bul hnai mai leh tui aṭanga kai theih vek a ni a, rúlhût damdawi hi kan zavaia ei loh chuan inkai awlsam tak a ni," a ti.

National De-Worming Day pual hian naupang kum 1-19 inkar mi 3,86,000 vel chu sorkarin a thlawnin rúlhût hlo pek a tum a, niminah khan mi tam tak pek an ni a, rokhawlhna vanga nimina rúlhût hlo ei lote chu February 15, 2016 (Mop-up Day)-ah pek an ni ang.

Rûlhut Dona Ni thupui chu 'Worm free children are healthy children' tih a ni a; Aizawl bakah district khawpui hrang hrangah pawh hman a ni.

Champhaiah pawh Rulhut Dona Ni hi GM High School-ah hman a ni a, DC Vanlalngaihsaka'n a hman pui. DC chuan sikul naupangte chu ram nghahfak, mipuite innghahna, hna pawimawh tak tak la thawk tur an nih thu sawiin, "Chumi atan chuan hriselna ṭha neih a pawimawh hle. Ram pum huap hian naupangte zingah thisen nei tlem (anaemic) an tam hle a, chumi bulpui ber pakhat chu rulhut pai vang a ni," a ti.