Mamit district-a sorkar laipui scheme thlirho

Mamit District Level Vigilance & Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin DC conference hall-ah an ṭhukhawm.

CL Ruala chuan, Committee member-te chu kângmei venna hapta a nih angin ram tihkan a nih loh nana ṭan la tur leh zirtirna uar turin a hrilh a, neitu rilru pua ramngaw duat turin a chah.

Ronald Sapa Tlau pawhin ramngaw humhalh a ṭul thu sawiin, "Mizoram hi mauah a hausa a, eizawnna tling thei turin sorkarin rua-hmanna a siam a ni," a ti.

Meeting-a tarlan dan-in, MGNREGA hnuaiah Mamit district-a job card nei mi 20,639 hnenah ni 34 inhlawhna siam a ni tawh. IAY hnuaiah cheng nuai 27 hmangin chhungkaw 36 tan in sak mek a ni a, IWMP hnuai-ah project kalpui mek pasarih a awm.

Swachh Bharat Mission hnuaiah ek-in (toilet) nei lo chhungkaw 114-te ek-in saksak an ni a, van-tlang zun-in leh bual-in West Phailengah pahnih sak a ni. Suarhliapa in tinah bawlhlawh báwm pahnih ṭheuh sem a ni a, bawlhlawh sâwngbâwlna hmun siam a ni bawk.

National Social Assistance Programme hnuai-ah kum 80 chung lam mi 399 leh kum 60 chung lam mi 1,678 hnenah tar pension pek a ni a, mi 331 hnenah hmeithai
sṭanpuina pek a ni.