Prison Minister-in Lawngtlai jail a tlawh

Prison minister R Lalzirliana chuan nimin khan Lawngtlai District Jail a tlawh a, thawktute leh jail táng mekte a kâwm.

R Lalzirliana chuan, jail-a táng mekte chu ram leh khawtlang duh loh zawng eng emaw thil an tih palh vanga táng an nih thu sawiin, chutiang mi ni reng lo a, khua leh tui ṭha, ram leh khawtlang tana mi ṭangkai leh mi dangte ṭanpuitu ni tawh zawk turin a fuih.

Minister chuan, jail táng mekte chu ei leh in leh inenkawlna dang an dawn ṭhat leh ṭhat loh a zawt a; táng mekte chuan engkim an dawn ṭhat thu an lo hrilh a ni.

Jail tángte chuan Prison Minister chu table tennis board an lo dil a, hemi chungchangah hian Lawngtlai DC J Hming-than-mawia'n a ngaihtuah-sak tur thu a sawi.

Jail superintendent Zosangliana sawi danin, Lawngtlai District Jail-ah hian thawktu 22 an awm mek a ni.