Rahul Gandhi hoin kawng zawh a ni; MNF-in BJP an thawhpui hi a mak - Rahul

Congress party hruaitu langsar Rahul Gandhi, Lok Sabha MP chuan nimin khan Aizawlah kawng a zawh a, mi tam takin an ṭawiawm. Rahul Gandhi chuan, BJP-in Mizo sakhua, culture leh ṭawngte an beih thu sawiin, "Hetiang a nih laia MNF-in BJP an thawhpui hi a mak hle a ni," a ti.

Rahul Gandhi hi nimin chawhma dar 10:30 velah helicopter hmangin Aizawl a rawn thleng a, Ṭhuampui helipad aṭanga Chanmari kàwn thleng lirtheia a kal hnuah, chhun dar 11:30 vel aṭangin Chanmari kâwn aṭangin Raj Bhavan hmàr lam gate bul thleng kawng a zawh a ni.

Rahul Gandhi hi mi ṭhahnem takin an zui a, kawng lakah mi eng emaw zatin an chibai bakah thla an lâkpui. Hun rei tak chhung Mizorama Congress party president ni tawh Lal Thanhawla in zawn an thlenah an chàwl a, Lal Thanhawlate nupain thilpek an lo hlan a ni.

Raj Bhavan gate bulah kawngzawh khàrna inkhawm neih a ni a, MPF general secretary Rev. Lalramliana Pachuau-in a kaihruai. Kawngzawh tàwpna hmun an thlen hi chuan mi 1,400 vel an tling tawh tih police-te chuan an sawi. Chawhnu dar 1:30 velah kawngzawha telte chu an ṭîn darh.

Rahul Gandhi chuan, BJP-in Mizote sakhua, hnam nunphung leh ṭawngte an bei mek nia sawiin, "Chutih laia MNF-in an thawhpui hi a mak. INDIA (Indian National Developmental Inclusive Alliance)-in sorkarna kan siam dawn a, Mizote sakhua, in ṭawng leh culture-te hi kan humhimsak ang che u. Hei hi kan tan thil pawimawh a ni. Mizo culture, sakhua leh ṭawngte hi tihchhiat a nih chuan India tihhchiatin a awm tihna a ni dawn a, chuvangin, INDIA chuan a ngai pawimawh hle a ni," a ti.

Tun hnaiah Manipur a tlawh thu sawiin Rahul chuan, "Ka thil hmuhte kha ka awih lo hial zawk. BJP-in Manipur a tichhe vek tawh. Heti khawpa an tawrhna a nasat laia Prime Minister-in a tlawh miah lo hi a mak hle. Israel rama thil thleng ngaihven viau siin, Manipur-a thil thleng a ngaihven duh miah lo," a ti a; Manipur thil thleng chu BJP-in INDIA thil tum tihchhiat a tumna hmanrua a nih thu a sawi.

Rahul Gandhi chuan INDIA-in eng sakhua pawh, eng hnam pawh, eng ṭawng pawh humhim a duh tih sawiin, "India rama chengte sakhua, hnam leh ṭawngte hi a pawimawh dan a inang vek. BJP chuan hei hi a duh lo a, inhuatna leh inhmelmâknate an thlen mek. Manipur-a thil thleng hi natna lang chhuak a ni a, India ram hmun dangah lian tham loin a thleng mek zel. BJP sorkar hnuaiah hnam tlem zawk leh tribal-te an hlim thei tawh lo," a ti.

Mizoramah MLA inthlan a awm dawn hnai tih sawiin Rahul-a chuan, "Kum nga kal taah khan sorkar laiin eng nge a tih ngaihtuah a ngai. Ruihhlo a hluar hle a, kum nga chhungin ṭhalai 250 chuangin an thih phah tawh. Ṭhalaiin hna an neih loh avangin ruihhloah an ṭuan nasa tih min hrilh a, kum nga chhungin hna 2,000 chiah an siam a ni," a ti a; MNF sorkar hnuaiah kawng, hmasawnna ruhrel leh economy a chhiat nasat thu a sawi.

AICC hruaitupa chuan, Mizoram chu a thin­lungah a beh tlat thu sawiin, "Kum 1986 khan kum 16 mi chauh niin ka nu leh pate nen Mizoram ka rawn tlawh tawh a, khami ṭum khan Mizote chungchanga ka ngaihdan min zawt se, ngilnei, hawihháwm leh an bula awm nuam, ngaihdan ṭha tak nei tiin ka chháng ngei ang. Mipui tam zawk kâwm tura rawn kal leh ngei ka tum. Mizoramin rambuai tak aṭanga kum 1986-a remna a nei hi a lawmawm tak zet a ni," a ti.

Rahul Gandhi hian nimin tlai khan Lal Than­hawla Audi­torium-ah zirlaite a kâwm. Ruahman dan chuan vawiin zingah party mite kâwmin, chawhma dar 10:30-ah thuthar thehdarhtute a kâwm ang a, chumi zawhah helicopter-in Lunglei panin vantlang inkhawmah thu a sawi ang.

Lunglei aṭang hian Mizoram chhuahsanin, Agartala a pan dawn a ni.