Theihtawpa min hâhum khumtute hi sabengtung mai an ni - Zoramthanga

MNF president Zoramthanga chuan MNF chu nationalism tawtawráwt kengtu a nih thu leh, MNF hâhum khumtute chu sabengtung mai an nih thu a sawi.

Zoramthanga hian nimin khan Mizo Hnam Rûna inkhawmah thu sawiin, "MNF hi nationalism tawtawráwt kengtu kan ni a, tu nge kan nih tih hi central sorkar leh kan chhehvel ramte'n an hre tawh. Harsatna kara sorkàr hi MNF hian a dâwl zo em em a, MNF hi theihtawpin min hâhum khum mah se, min hâhum khumtu hi sabengtung mai a ni tih kan hria," a ti.

MNF chu hnam thinlung kengtute an nih thu leh zirlai pawl tan hnam thuthlung kengtu party-a tel chu ṭhan­duanna ṭha tak nia sawiin Zorama chuan, "MNF hian hnam thuthlunga chiang zirlai pawl hruaitute a rût zel a ni," a ti a; MNF-in hnam thuthlung an zui zel a, Pathianin a thuthlung zuitute a hruai zel niin a sawi.

MNF President chuan, kil tin aṭangin beihna chi tinrêng an tâwk nia sawiin, "Hnam thuthlunga din kan nih avangin kan nghîng ngai lo. Hnam tana ding ngam, thi ngam kan nih miau avangin kan dinnaah kan nghet a, kan buai ve ngai lo. Kum khat pawh daih lo party, party thlâk reng ang mai kan ni ve lo," a ti.

Zoramthanga chuan, "Min enchhin rawh u, ti ṭhinte hi sabengtung sakei vun sin mai a nih avangin sakeibak­nei hràm­in hrâm ṭhin mah se, tu mahin an hlau tak tak thei lo," a ti a; nghet taka kum 60 chuang MNF hruai­tuin an hma a hruai zel dawn thu a sawi bawk.

MNF President hian MZP president hlui Lalnunmawia Pautu leh MZP hruaitu dang ṭhenkhatte MNF party-ah a lawm lut a ni.