Party dangte'n ZPM min beih rawn - Lalduhoma
ZPM leader Lalduhoma chuan, kum dangah chuan inthlan dawnah political party dangin rorel lai party an beih rawn ṭhin laiin, kumin inthlan dawnah erawh chuan eptu party ZPM chu party dangte'n an beih rawn niin a sawi.
Lalduhoma hian nimin khan Bawngkawn South YMA Hall-a ZPM Aizawl North-I block conference a hmanpuinaah thu sawiin, "Beih kan tâwk nasa. Inthlan a nih reng rengin ruling party kan beih rawn ṭhin a ni a, tunah erawh chuan ruling party leh a dangte'n kan party min beih rawn ta a, hei hi a danglam hle a ni," a ti.
Thil a ṭhat dawn leh dawn loh enchhin a ngai ṭhin tih sawiin Duhoma chuan, "Kum 36 chhung party pahnih thuhnuaiah kan awm tawh a, a thlakna tur hian mi dang enchhin tih ṭawngkam kan hman hi a fuh em em a, a sualna a awm lo," a ti a; ZPM party-in hma an sawn chak thu leh sorkar tura mipui rin ber a nih mek thu a sawi.
ZPM Leader chuan, ZPM din tirh lam, political party pawh a nih hmain kum 2018 inthlanpuiah pahnihna an nih theih thu leh, a hnua Tuirial by-election leh AMC inthlanah pahnihna an nih thu sawiin, "A hnu deuhah phei chuan pakhatna kan ni ta. Serchhip by-election, LMC inthlanah, Zemabawk LC inthlanahte seat zawng zawng kan la a, party dang an nil. Opinion poll hrang hrang enin, sorkar tura rin ber kan ni," a ti a; mihring lam inbuatsaihnaah chuan an inpeih thawkhat hle thu a sawi a ni.
Aizawl North-I biala ZPM candidate tur Vanlalhlana chuan, kum 5 MLA a nih chhunga MLA fund a hman dante chu a certificate a nih thu sawiin, "Hemi avang hian kan hruaitute chuan tun inthlan awm turah hian vote 2,000 chuanga kan chak an ring ta hial a ni," a ti.
Lalnghinglova Hmar, Aizawl West-II biala ZPM candidate tur pawhin thu sawiin, "Therhlo leh sorkar sum, mipui sum ni bawk hmanga thlun beh an tumte chu ṭhahnemngai taka hrilhfiah hna thawh a hun. Kum 2018-a an intiamna kha kum 2023-ah mi rethei leh berh zawk leh thil hre chiang lote thlun beh nana hman an tum a ni," a ti a; SEDP hnuaia pawisa sem chu MNF pawisa a nih loh thu a sawi.
Inkhawmah hian ZPM zawm thar mi 489 chu Lalduhoma’n a lawm lut niin ZPM thuchhuah chuan a tarlang.