Lunglei South-a INC candidate tur chiang lo

Mizoram Legislative Assembly inthlanpuia Congress party candidate tura ruat, All India Congress Committee (AICC) hotute'n an pawmpui tawhte chu nimin khan thehdarh a ni a, Lunglei South biala candidate tur tarlan a ni lo.

Congress party candidate turte list copy thehdarhah hian AICC general secretary KC Venugopal-a'n hming a ziah hnan (sign) bakah, AICC round seal chhut hnan a ni a; candidate list chu AICC Central Election Committee-in a pawmpui tawhte a nih thu ziah lan a ni bawk.

INC candidate tur list-ah hian Lunglei South biala an candidate tur a lang ve lo a, he biala candidate tura MPCC-in an lo ruat tawh chu Miriem L Hrangchal a ni.

Thu dawn danin, MPCC chuan an candidate turte chu vawiin hian an puang dawn a, Lunglei South biala candidate tur pawh an puan nghal rin a ni.