Sorkar ram khawtlang tana pek sût turin pawl 3-in sorkar an phût

Mizoram Industries Association (MIA), Mizoram Chamber of Commerce & Industries (MCCI) leh Mizoram Industries Owner Association (MIOA) chuan thuchhuah inṭâwm siamin, Mizoram sorkarin Ramhlun Venglai community hall atana Rural Industrial Development Centre (RIDC) hmunhma leh inte a pe chu an duh loh thu an tarlang a, sût turin sorkar an phût.

Pawl pathumte chuan, August 31, 2023 khan chief minister Zoramthanga hoin RIDC gate leh in kalhna chhut chhiat a nih thu an tarlang a, "Department hotute hriattir hmasa loa an lut mai hi a mawi lo a, department leh Mizorama thil siam lama eizawngtute ngaihnêpna leh palzûtna nasa tak a ni," an ti a, thleng nawn tawh lo se an duh thu an tarlang.

MIA, MCCI leh MIOA-te tarlan danin, a hmain Chaltlanga Dyeing Centre, Luangmuala Handloom & Handicraft Centre, Lungleia Commerce building leh industrial estate ṭhenkhatte Mizoram sorkarin a lo chhuhsak tawh a ni.

Pawl pathumte chuan, "RIDC hmun hi thil siama eizawngtute leh eizawn nana hman tumte tana sorkar laipui hnuaia agency hrang hrang - DSIC, KVIC, MSME-DFO, BIS, SIDBI, MCCI, MIZ leh bank branch-te dah khawmna tur leh thil siam chhuaktute'n an thil siamte pho lanna tur exhibition hall dinna atan sorkar laipuia MSME leh Mizorama Commerce & Industrices department-te'n project lian tham kalpui turin an ruahman mek a ni," an ti.

Project lian tham dinna tur chu thil siam chhuaktute'n an chán a nih chuan a pawi dawn thu an tarlang a; Mizoram sorkarin DIC complex-a RIDC hmunhma Ramhlun Venglai community hall atana a pek tawh chu sût tur leh hall hmunhma tur chu hmun dang remchang zawkah zawng turin sorkar an phût thu an tarlang bawk.