Champhai dist-a special drive-ah cheng nuai 1,311 hû ruihhlo man tawh

Champhai police-te chuan kumin August thla tàwp lama ruihhlo do (special drive) an kalpui hnuah cheng nuai 1,311 hû ruihhlo an man tawh.

Mizoram inthlanpui neih tura Champhai district tana expenditure observer Abhishek J Jain hoa October 14, 2023-a inthlan kaihhnawih mawhphurhna hrang hrang neite ṭhutkhawmnaah Champhai police hotute chuan, MLA inthlanpui hmachhawn tura an hmalaknate an tarlang. Kumin August thla tàwp aṭanga ruihhlo do an kalpuiah cheng nuai 1,311 hû ruihhlo an man tawh thu an sawi a ni.

Special drive-ah hian Champhai police-te chuan zu cheng nuai 44 man an man tawh a, dan kalha zu sakna hmun eng emaw zat an tihchhiat tawh bakah, zu siamna bungrua tam tham tak an man tawh. Ruihhlo - methamphetamine leh heroin cheng vbc. 12.67 hû an man tawh a; ruihhlo kaihhnawihah NDPS hnuaiah mi 35 leh MLP Act hnuaiah mi 23 an man tawh bawk.

Champhaia Excise & Narcotics hotute tarlan danin, inthlan puan ní, October 10, 2023 aṭangin special drive an kalpui a, October 14, 2023 thleng khan zu litre 283.4 leh mi pakhat an man tawh a ni.

Inthlan laia Champhai district-a venhim hna thawk tur central armed police force (CAPF) company pahnih chuan Champhai an thleng tawh a, Zokhawthar leh Champhaiah company khat ve ve an awm phawt dawn. Company pakhat dang thlen belh leh tura beisei a ni.