ZPM hi kalphung thar zuartu kan ni - K Sapdanga

ZPM working president K Sapdanga chuan, ZPM chu kalphung thar zuartu an ni a, ram hmelma hlemhlêtna leh eirukna theihtawpa do tura an intiam thu a sawi.

K Sapdanga hian nimin khan an party pisaa inkhawmah thu sawiin, "ZPM hi kalphung thar zuar kan ni a, kan ram hmelma hlemhlêtna leh eirûknate theihtawpa do tura intiam kan ni. Kan thil tumte a hlawhtlin theih nana thawhpui tur ṭha tak tak Pathianin min pe zel a, Pathian chungah lawmthu kan sawi a ni," a ti.

ZPM Working President chuan, tun hnaia ZPM zawm thar zinga a tam ber chu rorel lai party MNF aṭangin a nih thu sawiin, "Anni hi ram leh hnam tana an ngaihtuahnate sénga a tak taka rim taka thawktute an ni," a ti a; khua leh veng hrang hrang aṭangin mi hmingṭha tak takte'n ni tin ZPM an zawm zel niin a sawi.

Maj. J Thanruma pawhin thu sawiin, ZPM chuan an hotute thu an zah thiam a, an chawimawi thiam a ṭul thu sawiin, "ZPM chuan kalphung thar kan zawrh avangin kan policy-ah chauh ni loin kan MLA candidate-te chungah VUC chu kan thîkthu a chhe hle dawn. Ruih theih thil laka fihlim turin kan beisei a, nun dan, ṭawngkam hman thuah pawh fimkhur hle turin kan phût. Mi pakhat chauh pawh ruih theih thil leh mipat hmeichhiatnaah a fihlim loh chuan kan en liam dawn hauh lo," a ti.