SEDP hmangin mipui dinhmun chawi kàn kan tum - Tawnluia

MNF senior vice president Tawnluia chuan nimin khan Khawhai leh Sialhawk khuaah MNF campaign office a hawng a, MNF party chuan SEDP hmangin ram mipui dinhmun chawi kàn an tum thu a sawi.

Tuichang biala MNF candidate tur Tawnluia chuan, "Remna leh rálmuanna hnuaiah khawtlang ei leh bàra intodelhna nei turin theihtawp kan chhuah a, SEDP hmangin ram mipui dinhmun chawi kàn hi Pu Zoramthanga kaihhruai MNF sorkar hian kan tum a ni," a ti.

MNF tum bulpui lian ber pakhat chu remna leh muanna tluantling neih a nih thu sawiin Tawnluia chuan, "Kan ṭhenawm aṭangtein raltlante an lo awm a, an nunphung a ralmuang lo a ni. Keini erawh chuan kan remna thuthlung kan vawnghim reng a, state ralmuang ber nih zel kan tum," a ti a; remna thuthlung hlutzia zir nawn turin mipui a chah.

Tawnluia chuan, MNF chu Mizo hnam hmahruaitu party a nia sawiin, Zoramthanga kaihhruaina hnuaiah lungrual leh pumkhatin an kal thu a sawi a, "Kalphung nghet nei party kan ni a, mipuiin rintlak leh belhtlakah min dah. Kumin 2023 general election-ah hian hnehna sang tak nen mipuite'n min sorkartir leh ngei an tum a ni," a ti.