Ngaihdam dil turin Rahul Gandhi phût

MNF ṭhalaite chuan thuchhuah siamin, "Rahul Gandhi hian a pi Indira Gandhi sorkarin Zo fate min bomb avangin ngaihdam dil rawh se," an ti.

Rahul Gandhi a rawn zin chungchanga nimina MNYF thuchhuah chuan, MNF hoin zalenna an sual laiin India sorkarin Mizoram a bomb tih tarlangin, "Vawiina Mizorama a rawn zin mek lai hian a pi leh a kaihhruai Congress sorkarin Zo fate min bomb avang khan ngaihdam a dil ngei kan phût a ni," an ti a; India sorkarin Mizoram a bomb chungchang chu Mizote thinlungah a la thih loh thu leh Rahul Gandhi-a'n pawi tihna leh inchhîrna neih nachang a hriat an rin thu an tarlang.

MNYF chuan, Mizoram buai ṭan tirh laia prime minister chu Indira Gandhi a nih thu sawiin, "A kaihhruaina hnuaia Home minister GL Nanda chuan Zo fate nuai chimih vek pawi ti loin, a sipai tam tak hnenah thupek chhuahin, 'Crush them' tiin a tir chhuak a ni. Jet fighter hmangin min bomb darh vek turin an rawn thawk chhuak a, Zoram hmun tam takah, nunau pawisawilote nen vaihma vekin, thlawhna hmangin March 5, 1966 khan min bomb darh nasa hle. Pathianin min chelh a, min tihchimih tumtute an hlawh­chham a ni," an ti.