Lawngtlai DC leh MJA member-te inkâwm

Lawngtlai district bawrhsap Joseph H Lalramsanga chuan nimin khan a pisaah Lawngtlai district-a Mizoram Journalist Association (MJA) member-te a kâwm a; inthlanna felfai, thianghlim leh langtlang a awm theih nan mipui kaihhruai leh finchhuah kawnga thawhhopuiah a sáwm.

Joseph H Lalramsanga chuan, Lawngtlai district-ah MLA inthlanna ṭha taka kalpui a nih theih nan kawng hrang hrangin inbuatsaihna neih a nih thu a sawi a, "Election Commission of India-in inthlanna kalpui dan tur inkaihhruaina fel tak a siamte a rintlakzia mipuiin an hriat theih nan DEO-a hmalakna hrang hrangte hriatpuitu ni turin ka chah che u a ni," a ti.

Lawngtlai MJA president Lalngheta Ralte chuan MJA dinhmun leh an hnathawh dan tlangpui a tarlang a; Bawrhsap hnenah hian MJA patron member tura ruatna lehkha a hlan nghal. Lawngtlai district-ah hian MJA member 10 an awm mek a ni.