KHAWTHLIR

Zu hralh khap

Excise & Narcotics department chuan thupek chhuahin, Mizorama sipai (military) canteen aṭangin inthlan vuakvetah zu hralh phal a nih loh thu an tarlang. END tarlan danin, inthlan vote thlak ní, November 7, 2023 leh a hma ní November 6-ahte sipai canteen aṭangin zu hralh khap a ni a, vote chhiar ni November 3, 2023 erawh chu Pathianni a nih avangin a hranpaa dry day puan a ngai lo thung.

Tuitla ruang hmu

October 14, 2023 (Inrinni) chawhnu lama Chhimtuipui lui, Tuipuiferry-a tla hlum Daniel V Lalrinchhana ruang chu nimin zing khan hmuh a ni a, hlàwm nghal a ni. Lawngtlai aṭanga thu dawn danin, Daniel Lalrinchhana hi a tlak hnu aṭangin Central YLA leh MTP member-te leh Lawngtlai leh Siahaa mi tlawmngaite'n chhun leh zan zawmin an zawng a, nimin zing dar 8:30 vel khan a tlakna aṭanga hla tak, Bukpui lui chhuahah hmuh a ni.

Polling party randomisation

Mizoram MLA inthlanpui neih tura Khawzawl leh Saitual district-a polling party-te duty-na tur polling station chinfelna hmasa, polling party first randomisation chu nimin khan district pahniha district election officer-te kaihhruaiin neih a ni. Khawzawl district-ah chuan polling station 28 a awm a, presiding officer 35, assistant presiding officer 35, polling officer 70 an awm dawn a; hmeichhia vekin an vil tur pink polling station pathum leh ṭhalai hlangin an vil tur all youth manage polling station pakhat a awm.

AR-in silai mu man

Assam Rifles sipaite chuan October 15, Pathianni khan Tuivai leiah silaimu 20 an man a, a kawltu mipa pakhat an man tel bawk. Assam Rifles hian Mizoram leh Manipur inrina Tuivai leiah lirthei endikna hmun (vehicle checkpost) an siam a, Manipur aṭanga Mizorama lut tur lirthei an endiknaah silai mu 20 an man a, Mizoram police hnenah an hlan a ni.