Refferal Hospital tihchangtlun tum dan Eptu MLA-te'n an duh loh thu an sawi

Eptu MLA te chuan nimin khan an leader Vanlalzawma hoin Aizawl Civil Hospital leh State Referral Hospital tlawhin, damdawi-ina hmun hrang hrangte an enfiah. Eptu MLA-te chuan sorkarin State Refferal Hospital tihchangtlun a tum dan leh Aizawl Civil Hospital tihtêt a tum chu an duh loh thu an sawi.

Opposition MLA-te hian Aizawl Civil Hospital an tlawh-naah State Refferal Hospital-a doctor leh bungruate sawn chhuah a nih avanga mipuiin harsatna an tawhtheih tur nia an hriatte an enfiah. An sawi danin, Aizawl Civil Hospital hi khum 300
aṭanga khum 250 a tihtêt a, Aizawl District Hospital-a leh tum a ni.

MNF MLA Lalruatkima chuan, State Refferal Hospital tihchangtlun hrim hrim chu an do lo tih sawiin, "Kum 1984-a din Aizawl Civil Hospital hi mirethei tam takin a zár kan lo zawh tawh a. Refferal Hospital tihchangtlun tum a nih vanga ACH tihtêt tum kher hi ṭha kan ti lo. Hospital pahnih hi ṭha takin function ve ve se tih hi kan duh dan a ni," a ti a; sorkarin uluk zawkin ngaihtuahna séng se an duh thu a sawi.

State Refferal Hospital chu pan a buaithlak tih sawiin Lal-ruatkima chuan, "Thawktute leh damlote tan kal lam leh haw lamah sum tam tak sen a ngai. Hetianga tihlen an tum a nih chuan transportation leh a hmanruaahte hma la hmasa phawt se kan duh. Refferal Hospital ringawt kan ngaihtuah hian mipui tawrhna a thleng thei. Tih ve theih kan neih chuan kan inhuam reng a ni," a ti.

Lalruatkima sawi danin, tun dinhmunah State Refferal Hospital-ah hian blood bank a awm lo a, casualty-ah pawh on call duty chiah a awm a ni.

Medical college duh lutuk avangin state tan harsatna a thleng palh thei tih sawiin Lalruatkima chuan, "State medical college a nih chuan nakin zelah a enkawlna lamah harsatna kan tâwk thei. Tuna sum ruahman ringawt hi chuan rei a daih dawn lo. Sorkarin ngaihtuahna a sên uluk a ngai hle a, kan thil duh hi manganna leh lungngaihna min thlentu a nih a hlauhawm," a ti.

Dr K Beichhua chuan, inpuah-chahna mumal awm loin Aizawl Civil Hospital aṭangin hman-rua leh doctor-te State Refferal Hospital-ah sorkarin a sawn nia sawiin, "Damdawi-in hi de-part-ment dang nen a inang lo a, mihring nunna thil a nih avangin, insiam rem chhungin miin harsatna a tâwk thei," a ti a; Refferal Hospital chu tihchangtlun a nih dawn pawhin muangchanga kalpui nise ṭha an tih thu a sawi.

Beichhua chuan, "Engkim peihfel sa thlapin thil ti chu nise sorkar thil tum hi kan sawisel lo," a ti.

State Refferal Hospital-a deputy medical superintendent Dr Jane Ralte sawi danin, medical college dinna turah khum 300 awm tur ni mah se, Mizoram chu ngaihhnathiam zingah telin khum 250-ah phalsak a ni a, tun dinhmunah khum 250 hi a awm tawh. Khum bakah hian, Medical Council of India (MCI)-in medical college din tura thil pawimawh hrang hrang a sawite buaipui mek a ni.

Medical college din tur hian khum awm zat aṭanga 50% tal damlote'n an luah tur a nih bakah, damlo ni tin mi 400 tal an inentir tur a ni.