Mau hman ṭangkai dan tur sawiho

Chief minister Lal Thanhawla hoin nimin khan CMO Conference Hall-ah 'IKEA Workshop on Possible Sourcing of Bamboo Pro-ducts from Mizoram' neih a ni.

Chief Minister chuan, paper mill chu a hlâwk loh avangin sorkarin din ṭha a tih loh thu a sawi a, "A aia hlâwk zawk dap mek a ni. Tunah IKEA an lo lut dawn ta a, an duh dana kan kal thiam a pawimawh dawn hle," a ti.

Rajya Sabha MP Ronald Sapa chuan, "India rama mau awm zawng zawng aṭanga 35% chu Mizoramah a awm. Mau leh ruate hi a hlutna hmuh belh zel a nih avangin ‘Green Gold’ ti hiala vuah a ni," a ti a; Central sorkarin Mizoram chu Bamboo State-a siam a tum mek niin a sawi.

Workshop-ah hian IKEA (India) project leader Rajashekar P Warrier chuan IKEA chungchang leh hnathawh dan a lem nen a sawifiah.

Sorkar thuchhuah tarlan danin, IKEA hi inchhung bungrua (home furnishing) khawvela siam hnem ber pakhat a ni a, an thil siam chhuahte chu mau, rua leh changel káwr leh thing ṭha hmanga siam an ni.

Tun hma lama industry lian pui pui din ṭhin ang chi ti tawh loin, an duh ang siam thei tur nen partner anga kalin, mamawh tur ang design lam leh a kaihhnawihte chhawpsakin, a thawhpuite'n a hmanrua mau, rua leh a dangte an lo tum ve ṭhin dawn a ni.