DC hoin rel kawng tur lai chhunzawm

Mualkhang ram chhunga rel kawng laih chhunzawm lo tura mi ṭhenkhatin an tih chu, nimin khan Kolasib DC H Lalengmawia hoin a hmunah kal chihlin rel kawng hi laih chhunzawm a ni.

Mi 11-te'n an ram huam chinah rel kawng laih an remti lo a, thingin an huan an hung a, khawih lo turin thuziak an tar. DC hoa kalsorkar hotute chuan ram hungna leh thil târte chu tichhiain, rel kawng laih hna chhunzawm nghal a ni.

DC ṭawiawm hian Kolasib DDC, Revenue officer, Kolasib SDPO leh 1st IR police-te an kal a ni.

H Lalengmawia chuan, rel kawng laitute'n harsatna an neihte chu sorkarin a chingfel zel tih sawiin, "Tuna Mualkhang ram chhunga ram neitute'n an ram chhunga hna thawh an remtih loh chhan pawh chinfel a ni tawh. Dan ang takin Land Acquisition siam zawh hnuah assesment tih fel vek a ni," a ti a; chutiang a nih laia hna thawk thei loa insiam chu sorkarin ṭha a tih loh thu a sawi.

Hortoki chhak lam enkawltu North-East Frontier Railway deputy chief engineer Hari Singh chuan, Sairang bul hnai metre 800 huam chhungah hmun pali-ah huan hung a awm tih a sawi a, "Huan hungna hmun pali tih lohah chuan kawng laih hna thawh a ni tawh a, tunah chuan kan khawl zawng zawng nen hna kan thawk leh thei tawh ang," a ti.

Zawhna chhangin Hari Singh chuan, rel kawng tur laih phal lohna ram neitute chu zangnadawmna pek vek tawhna hmun a nih thu a sawi a, "Tunah hian dilna thar a lut leh a, chu chu tuna kan buaipui mek hi a ni. Eng vanga V/C Pass thar hi lo lut leh nge ka hre lo a, tute nge pawisa lo dawng tawh tih pawh kan hre lo a, thuneituten an hria ang," a ti. Railways lam chuan anmahni mimal leh a ram hmunhmate an hriat vek loh thu a sawi.

Thu dawn danin, Mual-khang ram chhung-ah hian mi ṭhenkhatin zangnadawmna dilna an thehluh tlai avangin a tira zangnadawmna dil 148 zingah an tel hman lo. Dilna thehlut tlai deuhte dilna chu district thuneitute te, ACB, Revenue department leh NF Railways hotute'n a hmunah an enfiah. Mi 11-te chu zangnadawmna la dawng lo mah se, pek tura siamsak tawhte an ni.

Zangnadawmna diltu 21-te chu an dik lo tih hmuh chhuah a nih avangin an dilna hnawl a ni. Hetih lai hian, mi 21-te chu Court-ah an zualko a, Court chuan thiam a chantir a; mahse sorkar chuan Court sang zawkah thlen a tum a ni.