Taxi intlân chhâwk sût tura ngenna Chief Minister hnenah thlen a ni

Aizawl Taxi Workers Union (ATWU) chuan nimin khan Chief Minister hnenah lehkha thawnin, Coordination Committee on Traffic Management-in Aizawla taxi intlan chhawk tura thupek a chhuah chu February 2016 ral hmaa hlîp turin an ngen.

ATWU chuan, Indian Constitution Part-II Article 5-in a sawi angin, India khua leh tui an nih avangin dikna chanvo an nei a, Article 19(1)(c)-in a phal angin ATWU an din a, Article 19(1)(g)-in zalen taka eizawn a phalsak a, The Motor vehicle Act hnuaiah ei an zawng tih an tarlang a; "Coordination Committee on Traffic Management hian Article 19(33) Violation of 19(1)g)-in chiang taka a sawi angin kan eizawnna leh zalenna min rahbehsak a ni," an ti.

ATWU chuan, taxi thlak harsa leh theih loh chungchangah hma lakpui turin CM an ngen a; Aizawla taxi service mek
ṭhenkhat chu hlui tawh tak takte an ni a, a thara thlak ngai tawhte an nih avangin, dan anga taxi thlak phalsak turin an ngen a ni.

Sorkarin lirtheiah life time tax a la chu an tlin loa an hriat thu sawiin, ATWU chuan, tun hnaia sorkarin life time tax lakna atana motor man aṭanga 6% a hmang chu ennawn a nih theih nana hma laksak turin an ngen.

All Mizoram taxi permit tihtawp a ni chu an hriatthiam loh tak zet thu sawiin, "Kum nga chhung atana tax kan chawi tawhte inpek kîr awm loa permit tihtawp a ni hi heriatthiam harsa kan ti," an ti.

All Mizoram taxi permit chu lak chawp ngaia tih a nih chuan rikrum thil leh thihna thilahte Aizawl páwn lama kal a ngaih chángin permit lak a harsa hle dawn tih an sawi a, "Ni khatah darkar 24 chhung Transport department hawn a nih loh chuan emergency thilah mipui tan harsatna lian tak min thlen dawn a ni," tiin, hma laksak turin an ngen a ni.

ATWU hi September 2015-a Aizawla taxi stand hrang hranga mite kalkhawmin an din a ni a, Trande Union Act 1926 Chapter II Section 6 hnuaiah an inziak lut niin an sawi.