Ṭul loa sum hman titàwp turin sorkar phût

PRISM party chuan May 23 khan thuchhuah siamin, Mizoram sum dinhmun a ṭha lo tak zet tih a lan avangin, Mizoram sorkar chu sorkar sum dinhmun dik tak puang tur leh ṭul loa sum hmanna titàwp turin an phût.

Covid-19 léng vangin sum leh paiah Mizoram sorkar a harsa ta tak zet nia a lan thu sawiin PRISM chuan, "Sorkar hnathawk hlawh pêk pawh a harsa ta niin a lang. Kan kal zel dan tur kan hriat thiam theih nan Mizoram sum dinhmun dik tak mipuiin kan hriat a ngai. Chief Minister-in sum dinhmun a hriat loh thu a sawi kha thil ni thei lo a ni a, tunah hian sorkar a mangang tawh niin a lang. Kan dinhmun dik tak sorkarin a puan chhuah ngei a ngai a ni," an ti.

PRISM chuan, "Sum harsatna kan tawh zual zel laiin Mizoram sorkar chuan ṭul lo leh a loa awm theihah sum a la séng nasa hle. Sum hmanna tam tak tihtawp theih a awm a, sorkarin a duhsak zawngte pawisa a pêkna atana siam board leh post eng emaw zat a awm bawk," an ti a; chu'ngte chu titawp nghal turin sorkar an ngen a ni.

PRISM party chuan, budget anga kal theih a nih tawh loh avangin, budget siam ṭha (re-appropriate) turin sorkar an ngen nawn leh bawk.