Kum 2018 inthlanah hnehna Kan chang leh dawn: Hâwla

MPCC president Lal Thanhawla chuan kum 2018 MLA inthlanah Congress party-in hnehna an chang leh dawn niin a sawi a, "A záwnin ṭum thum sorkarna kan siam dawn," a ti.

Lal Thanhawla hian nimin khan Congress Bhavan-ah thu sawiin, "Political party dangte'n min huphurh avangin a záwnin ṭum thum sorkarna a siam theih loh thu an sawi a, zâm tur a ni lo. State dangah pawh an tih theih chuan engah nge kan theih lo bik ang?" a ti a; party dangin theih loh anga an ngaih chu an party-in an thei dawn niin a sawi.

Mipuiin an party thlaktu turin mi dang hual an la nei lo nia sawiin MPCC President chuan, "ZNP-in third front siam a nih dawn thu a sawi a, tute nge an siampui ang. Sorkarna siam tur party dang an awm loa hriain tute emaw party din tum a, boruak thlir rengte pawh an awm," a ti.

Lal Thanhawla chuan, a kaihhruai sorkarah eiruk leh thawh dik loh sawi tur eptu party-te'n an hre lo nia sawiin, "Kan kalkawng a dikin a ṭha em em a. Thu dika kan din chuan dâwt leh phuahchawpin min bei mah se, a hlauhawm lo," a ti a; an party mite chu Congress sorkar tihnawktua ṭang lo turin a chah.

MPCC President chuan, MNF party chu programme leh policy nei loah a puh a, "MNF khan an sorkar laiin kuttling loa sum lak hna berah an nei a; sorkar leh an châk chan pawh an tih dan ngai chhunzawm an châk vang a ni. Bank-a an account a thau a, Mizoram mipuiin kan tuar thung. An tihchhiat kan siam ṭha zel a, tihchiat siam ṭhain ṭan kan la a ni," a ti.

AMC-ah sorkarna an siam loh avangin zâmna tur a awm lo tih sawiin Lal Thanhawla chuan, "Vote 100 emaw âwrh chauhin kan chak lo a, mahse, inen lêtna atan chuan hman a ṭha," a ti a; an party-in AMC-a sorkarna an siam tâk loh avangin Aizawl mai bakah Mizoramin a tuar theih tih a sawi.

Lal Thanhawla chuan Congress sorkar laiin Refferal Hospital atan sum a awm tawh nia sawiin, "Falkawna building sakna tur hmanruate a awm loh avangin PWD hotute hnenah ṭha taka sa thei tur contractor neinung deuh thlang turin ka hrilh. Mahse, kan tla ta a, MNF leh MPC sorkarin hna sem darhin, damdawi-in tur sa loin a behbâwm an sa a, ṭhenkhat chu a chhe hle," a ti.

State Refferal Hospital chungchangah MNF MLA Lalruatkima chuan hrechiang loa thil sawiah puhin, MPCC President chuan, "An hotupa leh senior MLA pawh an ngawih laiin a sawi vak a, hriat loh sawi chuan dâwt sawi a awl. A fing deuh chu an ngawi a, eng emaw deuh chu an ṭawng chhuak a ni," a ti a; Refferal Hospital tur an buaipui laiin MLA Lalruatkima chu politics-ah pawh a la luh a rin loh thu a sawi.