Sorkar leh HPC inremna tihpuitlin phût

Sinlung Hills Accord Implementation Demand Committee (SHAI-DC) chuan, Sinlung Hills Development Council (SHDC) Accord tipuitling tur leh a rang lama SHDC-ah inthlan buatsaih a nih theih nan hma la turin Chief Minister an phût a; an phût anga tihhlawhtlin a nih loh chuan High Court-a zualko an tum thu an puang.

SHAIDC hruaitute chuan nimin khan Aizawl Press Club-ah thuthar thehdarhtute kâwmin, an thil phûtte leh chief minister Lal Thanhawla hnena February 10, 2016-a lehkha an thehluh chungchang an sawi a ni.

SHAIDC chairman Vanlalsiama chuan, kum 1994-a Mizoram sorkar leh Hmar People Convention inremnate chu kum 22 hnuah pawh tihpuilin a nih loh thu leh, SHDC sorkarin an huam chhungah hna thawh an nei mumal loh thu a sawi.

SHAIDC-in Chief Minister hnena lehkha an thehluhah chuan, Mizoram sorkar leh HPC inremna thuthlung tihpuitlin a la nih loh avangin SHDC huam chhung mipuite hmathlir a tihbuai thu an tarlang a, "Council of Ministers Govt. of Mizoram Notification No.H.11/022/1/2013-GAD the 26th Sept. 2013 dungzuiin mimal kuta SHDC dah tawh lo a, mipuiin an aiawh a thlante ngeiin SHDC tihpuitlin nana hna an thawh theih nan a rang lama SHDC election min buatsaihsak turin kan ngen a ni," an ti.

An ngenna chu July 27, 2016 hma ngeia min tihpuitlinsak an duh thu leh, finfiahna (assurance) ṭha tâwk tun aṭanga thla khat chhunga an hmuh loh chuan, mipui duh dan leh beisei angin High Court-ah an zualko dawn thu an tarlang.

Zawhna chhangin SHAIDC secretary Lalparkunga chuan, an phût zinga an ngaih pawimawh hmasak ber chu SHDC hotu atan sorkarin a duh zawng dah tawh lo a, SHDC inthlan buatsaih a nih thu a sawi. Sorkarin SHDC huam chhung bial 12-a a ṭhen tawh chu an pawm thu a sawi laiin, inthlanna atan electoral roll revision neih a la nih loh thu a sawi a ni.

Lalparkunga chuan, SHDC chair-man ni lai Hmingchungnunga'n SHDC area hmasawn nan hma a lak leh lak loh an hriat loh thu a sawi bawk.