MLA-te'n PHE leh P&E hmun an enfiah

Mizoram Legislative Assembly hnuaia Public Accounts Committee (PAC) member-te chuan nimin khan an chairman K Sangṭhuama hoin C&AG Report bawhzuiin Durtlang Leitana PHED Ground Water & Quality Control Division hnuaia Quality Control Sub-Division leh Zuangtuia Power & Electicity hnuaia 132KV Sub-station hmunte an enfiah.

PAC member-te hian Quality Control Sub-Division-ah quality control hna an thawk loa hriat a nih vang te, thawktu hlawha cheng vbc. 2.14 sen ral a nih vangte leh, kum 1993-a lei chê vanga 132KV Sub Station kum 2009-a sawn chhuahna proposal siam tawh tihkhawtlai a la nih reng avangtein chung hmunte chu an tlawh a; department hotute thu an zawtfiah a ni.

Quality Control Sub Division-ah hian PAC-te hi PHE chief engineer Lalmuanzova hoin sub-division hotute'n an lo dawngsawng. PAC member-te zawhna chhangin PHE hotute chuan, Quality Control Sub Division-ah hian thawktu 20 an awm mek a, regular staff pali leh work charge staff 16 an neih mek thu leh, tunah bik hian work charge mi pasarihte an awm a, a dang zawng chu division dangah dah an nih thu an sawi.

Quality control chungchangah, tui enfiahna State Refferal Institute chu Tuikhuahtlangah a awm thu leh sub-division huam chhungah sak mek a nih thu an sawi a; pipe quality enfiah hna an thawh reng thu PAC-te hi an hrilh. Receipt leh issue chhinchhiah a nih dan zawhna chu, challan hmanga felfai taka tih a nih thuin an chháng.

Zuangtuia 132KV Sub Station-ah chuan PAC-te hi Power & Electricity engineer-in-chief L Pachuau hoin sub-station hotute'n an lo dawngsawng. PAC zawhna chhangin P&E hotute chuan, sub-station sawn hna chu March 2016-a zawh hman tum a nih thu an sawi.

Sub-Station sawn hna tihkhaw-tlai a nih leh nih loh chungchanga zawhna chhangin, E-in-C L Pa-chuau chuan, "132 KV Sub-Station hmun hi kum 1993 khan a min a, a vaia tlahniam loin boundary hmun ruka ṭhena hmun khat ang vel a tlahniam. Kum 2003 thleng khan che nawn a awm lo a, Geology & Mineral Resources department pawhin an rawn enfiah reng a, ngaihtuahawma a lan loh avangin buaipui vat a ni lo," a ti.

P&E E-in-C chuan, 132KV Sub Station sawn hna chu cheng vbc. 20.77 hmanga zawh fel theih tura ruahman a ni tih thu sawiin, "Sub-station hmun tharah hian vuah khawm mai tur a ni tawh a, kumin March thlaah zawh beisei a ni," a ti a; physical leh financial-ah 90% an zawh tawh thu a sawi.