KHAWTHLIR

Lawngtlaiah fire prevention rally

Lawngtlai District Level Fire Prevention Committee chuan, nimin khan Lawngtlai khaw chhungah Fire Prevention Rally an buatsaih. Rally-ah hian zirlai naupangte'n kângmei laka inven a pawimawhzia leh ramngawte humhalh a ṭulzia thuziak an keng a, lirthei chi hrang hrangah inzirtirna flag an tár bawk a; Aeropagy
aṭanga Chandmary Square thleng an kal a ni.

Home tanpui

Mizo Students' Union (MSU) an din champha pualin nimin khan MHIP gen.hqrs. enkawl Hmangaihte Rûn leh Salvation Army enkawl Motherless Babies Home ṭanpui nan Rs. 5,000 ve ve a hlan. MSU February 12, 1986-a din a ni.

Mei zu man

Aizawl District Anti Tobacco Squad chuan nimin khan New Market-ah squad drive an nei a, phal lohna hmuna mei zu mi 15 manin, pawisa an chawitir. Saiha District Anti Tobacco Squad pawhin Saiha College Veng leh New Colony-ahte squad drive an nei a, phal lohna hmuna mei zu mi pali manin pawisa an chawitir a ni.

Helipad enfiah

Parliamentary secretary TT Zothansanga chuan, nimin khan New Champhaia helipad tur siam mek a tlawh a, hnathawh dan a enfiah. Helipad sian hna hi thawh zawh deuh vek tawh a ni a, enchhinna (trial landing) pawh tih theih a nih tawh thu engineer-te chuan an sawi.

Zirtirtute dan zirtir

Lawngtlai District Legal Service Authority leh LADC Education department chuan nimin khan LADC Conference Hall-ah primary school zirtirtute pualin dan zirhona (legal awareness seminar) an buatsaih. P/S zirtirtu 120 vel an tel a ni.

Serampore College

Serampore College (University) chuan vawiin hian Synod Conference Centre-ah 'Seminar on the Mission & Vision of Serampore College' leh 'Launching of Friends of Serampore College' hun an hmang dawn.

Chapchar Kût hman dan tur sawiho

Lawngtlai District Chapchar Kut Organising Committee member-te nimina Lawngtlai DC J Hmingthanmawia hoa a pisaa ṭhukhawm chuan Chapchar Kût leh Lai kût pakhat, Hlukhla Kût hman kawp an rêl. Chapchar Kût leh Hlukhla Kût hman kawp tur hi Hlukhla Chapchar Kût tih an vuah a, Kut hmanna tur atan CYLA khelmual ruahman a ni a ni.Mamitah pawh DC Conference Hall-ah addl. DC H Lianzela hoin YMA, MUP, MCO, MZP leh MZI hruaitute'n Mamita Chapchar Kût hman dan tur nimin khan an sawiho a; Chapchar Kut chu GSA khelmualah chawhma dar 11 aṭanga hman an rêl.

Lei ngaihsak loah sorkar puh

MNF ṭhalaite chuan Sihhmui leh Lengpui inkara Tlawng lei, December 2, 2015 zana chim ta leh a bula lei thar tur dawh mek chu sorkarin a ngaihsak lo niin an sawi. MNYF-te hian lei hi nimin khan an enfiah a, Buichali lei an en nghal bawk. MNYF-te cuan, lei chim ta thlakna tura a bula RCC lei dawh ṭan tawh chu July 17, 2009 aṭanga Tantia Constructions, Kolkata-in an thawh ṭan tawh a nih thu sawiin, "August 1, 2011-a thawh zawh tur a ni a, lei siamna atan cheng nuai 795.89 dah a ni. Tantia hian an hna hi hmabak tam zawk hnutchhiaha an chawlhsan daih mai hian ngaih a tiṭha lo a, kan lalchhungkuate nen hian an lo inzakkep tawn em ni, tih hi kan zawhna a ni," an ti.