MNF-in Referral Hospital-ah sawi tur nei lo: MPCC

Congress party-a Media depart-ment chuan thuchhuah siamin, State Referral Hospital, Falkawn chungchangah MNF party-in sawi tur an nei lo niin an tarlang a, "MNF party-in a lo tihchingpen sawi mâm nana opposition MLA-te'n hnathawh kal mek an sawisel hi a zialo hle," an ti.

MPCC Media department chuan, MNF MLA-te'n February 11, 2016-a Aizawl Civil Hospital leh State Referral Hospital a hmuna an en chu lawmawm an tih rualin, sawisel thei an nih loh thu an tarlang.

MPCC tarlan danin, kum 1993-98 chhunga Congress sorkar laiin Referral Hospital dinna tur sorkar laipuiah cheng vbc. 40 sawi chhuah a ni a, kum 1998 aṭanga MNF-in sorkarna an han chan hnuah party mite induhsak nan an hman avang leh MNF worker-te'n hna an thawh
ṭhat loh avangin khum 500 awm thei tura Congress sorkarin a ruahman tawh chu MNF sorkarin khum 50 awm theihna atan a chhuah a ni.

Kum 2008 tawp lama Congress-in sorkarna a chan leh hnuah Referral Hospital chu tharthawh leh a ni a, medical college din nan ruahman niin, khum 250 awmna turin siam a ni ta niin MPCC chuan an sawi a, "Indian Medical Council hotute an lo kal mai beisei a nih avangin Health department chuan a theih ang anga thuam tumin ṭan a la mek a ni," an ti.

Congress party chuan, Aizawl Civil Hospital chu khum 300 anga chhàl ni mah se, a tak takah chuan khum 250 bak a leng lo nia sawiin, State Referral Hospital tihchangtlun tumna vangin Civil Hospital chu tihtêt tumna a awm loh thu an sawi a; MNF MLA-te’n State Referral Hospital chu MNF-MPC sorkarin a din anga an sawi chu zahthlak an tih thu an sawi bawk.