Dan loa awm hnam dang 42 man

MZP bultumin nimin zing kar khan Aizawla hmun hrang hrangah hnam dang dan loa awm leh sumdawngte enfiah a ni a; Inner Line Permit (ILP) nei mi mi 37 leh dan loa sumdawng hnam dang panga hmuhchhuah a ni.

MZP chuan, ILP nei lo leh dan loa sumdawng hnam dang man chhuahte chu police hnenah hlan a nih thu an sawi a, "Zing kar vawi khat hnatlannaa hnam dang dan loa awm leh sumdawng tam tak man chhuah tur an awm leh hnam dang kum tling loa hnathawk kan rama an tam ta lutuk hi pawi kan ti hle," an ti.

MZP tarlan danin, Dan loa awm hnam dangte dapnaah hian MZP hruaitute bakah college hrang hranga students union hruaitute an thawk chhuak a; hnam dang dan loa Mizorama awmte chu anmahni leh anmahni lo in sponsor-te leh hnam dang vêkin an sponsor-te an ni hlawm.

MZP chuan, ILP chu a nihna ang taka hmang tur leh a pek chhuah danah fimkhur leh zual turin thuneitute an ngen a; dan loa hnam dang sumdawngte dapchhuah kawngah Mizo mipui thlawpna an ngen bakah, hnam dang thlavâng hauh lo turin mipui an ngen bawk.