Sorkar driver inkhawmpui

Mizoram Government Drivers’ Association (MGDA) chuan, nimin khan Synod Conference Cen-tre-ah conference an hmang a, chief minister Lal Thanhawla'n a hmanpui.

Chief Minister chuan, driver-te an pawimawh thu sawiin, "In kutah mi nunna a awm tih hrereng chungin fimkhur a ṭulzia theihnghilh suh u. Hun kal tawh thlirletin tunah chuan hma in sawn nasa hle tawh tih a hriat a, inthlahdah tawk la awm bawk mah se, thil duhawm lo hriat tur a tlem ta hi a lawmawm hle a ni," a ti.

Driver-te chu hmun tin hmun tanga kal
ṭhin an nih avangin ram aiawh (ambassador) an nihna lai a awm tih sawiin Lal Thanhawla chuan, hawihhâwmna tur te, thawmhnaw inbel uluk tur leh faina ngai pawimawh turin a chah.

CM Hawla chuan, driver-te'n rinawmna an kengkawh ṭhin chu lawmawm a tih thu sawiin, "Taxi driver-te'n an passenger-te thil theihnghilh chanchinbu lama an chhuah ṭhin hi a ropui a, hmun dangah hetiang hi hriat tur a tam lo hle," a ti a; mi dangte tana malsawmna thlentu nih ṭheuh tum turin driver-te chu a fuih a ni.