March-ah lei chim dawh zawh hman beisei

Congress party ṭhalai chuan thuchhuah siamin, Sihhmui leh Lengpui inkar Tlawng lei, December 2, 2015 zana chim chu Mizo-ram sorkarin March 2016 chhunga dawh ṭhat a tum niin an tarlang.

MPYCC thuchhuah chuan, MNF ṭhalaite'n Tlawng lei chim an en hnua thuchhuah an siamah, sorkarin lei chim a ngaihsak lo anga an puangzar chu thu dik hre zîktluak loa mipui bum tumna niin a tarlang a, "Tlawng lei a chim hnu khan sorkarin theihtawp chhuahin hma a la a, kumin March thla hian dawh zawh hman tum a ni," an ti.

MPYCC tarlan danin, Tlawng lei chim dawh leh turin PWD Engineer-in-Chief hoa meeting thurel angin PWD executive engineer (NH Division-I) chuan January 24, 2016 khan payment bawhzui turin Guwahati-ah regional officer a dawr a; tih tur a tihfel hnuah Howrah, Kolkata-ah bailey bridge part-te February 20, 2016 aṭanga thawn turin Shiba Industries a be fel a ni.

Congress ṭhalaite chuan, "Sorkar chak tak hmalakna enin, Tlawng lei chim hian ngaihsaktu a hmu lo mai a ni lo a, a changtu chief minister Lal Thanhawla hmalakna hi a chakin kan chhuang hle a ni," an ti.