Medical college atan vbc. 20 rawn pe ACH tihtêt kan tum lo: Health Minister

Mizorama medical college dinna turin sorkar laipuia Ministry of Health & Family Welfare chuan tun hnai khan cheng vbc. 20 a pe (sanction). Hetih lai hian, Health minister Lal Thanzara chuan, State Referral Hospital-a medical college din tum vangin Aizawl Civil Hospital tihtet tumna a awm loh thu a sawi.

Minister Lal Thanzara'n Vang-laini palai a hrilh danin, medical college dinna atan hian Health & Family Welfare ministry chuan non-recurring grant-in-aid in cheng vbc. 20 a rawn pe a, "Pawisa hi hman a theih a nih thuai theih nan bawhzui mek a ni," a ti.

Health Minister chuan, Aizawl Civil Hospital (ACH) chu sorkarin tihtêt a tum lo tih sawiin, "Falkawna medical college din tum a nih takah chuan damlo a enkawl theih tawka siam tumna, tun hma aṭanga lo awm tawh chu sorkarin chak zawkin a bawhzui mai a ni," a ti a; State Referral Hospital tan operation theatre bungrua a ṭul ang ang lei mek a nih tuh leh, duhthusama peih a nih hma chuan ACH-ah a ṭul anga inzai zel tur a nih thu a sawi.

State Referral Hospital-ah blood bank pangngai neih a nih hmaa thisen mamawh ang hman mai tur a awm theih nan thisen dahna tur refrigerator dah tum mek a nih thu sawiin, Lal Thanzara chuan, "ICU tur pawh ruahmanna chak taka kalpui mek a ni a, ACH
aṭanga Referral Hospital-a damlo refer-te a ṭul anga phurh nan ambulance ruahman a ni," a ti.

Health Minister chuan, ACH aṭanga State Referral Hospital-a doctor leh hmanraw ṭhenkhatte sawn chungchangah, damlote'n an tawrh loh theih dan tur bera kalpui a nih thu a sawi a; veivahna (transportation) chung-changah, Transport Minister-in MST bus eng emaw zat a ruahman thu a sawi bawk.

Zawhna chhangin minister Lal Thanzara chuan, Health de--partment leh damdawi-ina thawktute zingah sorkar hmalakna tiṭhuanawp emaw, tisukuk zawnga che an awm a rin loh thu a sawi.