AVDB-in thisen pek rûnpui an buatsaih

15th February, 2016

Association for Voluntary Blood Donation (AVBD) chuan Valentine's Day pualin February 13 khan Aizawl Civil Hospital (ACH)-ah thi^-sen pek rûnpui an huaihawt.

Ṭanna inkhawma khuallian, Health minister Lal Thanzara chuan, "Mite'n tlawmngaia an pek thisen dawngtu nih a lawmawm hle a, chu ai chuan a petu nih hi a lawmawm lehzual," a ti.

‘Blood for Your Valentine’
ṭan-na inkhawm hi ACH medical superintendent Dr Rosangluaia'n a kaihruai a; Lal Thanzara chuan, Mizoram chu Valentine’s Day thisen pekna ni atana hmang hmasa ber a nih a rin thu leh hmang ṭangkai ber a nih a rin thu sawiin, “Thisen pek kawngah India ram tan méllung pawimawh tak Mizoramin a siam a ni," a ti.

A thlawna thisen petu ṭhalaite chu an hlu tak zet tih sawiin, "Mizo-ram vanneih em emna pakhat chu thisen pek kan intihhmuh hi a ni a, tlawmngai pawl hrang hrang leh kohhran ṭhalaite leh zirlai/NSS volunteer-ten an uar chho zel hi a lawmawm tak zet a ni," a ti.

Thisen mamawhna a san zel avangin a petu an pun zel a ngai tih sawiin, Mizo ṭhalaite chu thisen pek uar zual zel turin a sáwm a; thisen pek rûnpuia senso phuhrûk nan AVBD hnenah Rs. 30,000 a pe.

MSACS project director Lal-mal-sawmi Sailo pawhin thu sawiin,
ṭhalaite chu blood donation camp-ah chauh thisen pek tum lo a, thla thum dana thisen pe ṭhin turin a sawm.

Inkhawmah hian mipaa thisen vawi 50 aia tam pe tawh C Lalremruata, Electric Veng (vawi 60) leh RC Rokhum, Mission Veng (vawi 58) te, hmeichhe zinga vawi 40 pe tling tawh Rebecca Saimawii, Khatla (vawi 44) leh Zothantluangi, Mission Veng (vawi 41)-te hnenah chawimawina hlan a ni.

Kumina Blood for Your Valen-tine-a thisen pe zawng zawng chu unit 315 a ni. ACH bikah mipa 181 leh hmeichhia 67-te'n thisen unit 248 an pe a, Synod Hospital-ah mipa 16 leh hmeichhia pangate'n unit 21 pein, Mamit District Hospital-ah mipa pa-kua leh hmeichhia palite'n unit 13 an pe.

AVBD gen secy C Lalnunnema'n report a pek danin, Blood for Your Valentine-a thisen pek tawh dan chu - kum 2010-ah unit 146, kum 2011-ah unit 350, kum 2012-ah unit 425, kum 2013-ah Aizawl leh khawpui hrang hrangah unit 757, kum 2014-ah Aizawl leh district khawpuiah unit 940, kum 2015-ah Aizawl leh district khawpuiah unit 750 te a ni.