KHAWTHLIR

Hmeichhe Inkhawmpui

Mizoram Presbyterian Kohhran Hmei­chhia, pastor bial hrang hrangtechuan Synod calendar angin February 12, 2016 zan aṭang­in bial inkhawmpui an hmang a, nizan khan a ṭiak. Inkhawmpuiah hian Inrinni khan rorel inkhawm neih a ni.

Thisen pe

Khatla North Branch KṬP chuan Central KṬP blood donation calendar angin Inrinni khan thisen an pe a, mipa 31 leh hmeichhia pahnihin Synod Hospital tan unit 33 an pe.

Hospital Ni

Mizoram Baptist Kohhran chuan tualchhung kohhran hrang hrangah nimin khan Kristian Hospital Ni an hmang a, thupui chu 'Nang malsawmna ni ang che’ tih a ni. Kristian Hospital Ni an hmannaah te chu Christian Hospital, Serkawn leh Lawng­tlai tan pek a ni dawn. Serkawna Christian Hospital hi February 10, 1923-a hawn a ni.

Traveller Inn

Rural Development minister R Lalzirliana chuan February 12, 2016 khan Buarpui khuaa RD department-in 'Traveller Inn' an siam thar a hawng. Minister hi parliamentary secretary Lt.Col. ZS Zuala leh H Zothangliana bakah, MLA Chalrosanga Ralte ten an ṭawiawm a; Buarpui damdawi-in (PHC) tlawhin, damlote a kan nghal bawk.

Tlabungah DIG

Police deputy inspector general (Southern Range) Joseph Lalchhuana chuan Inrinni khan Tlabung Police Station a tlawh. DIG hnenah hian Tlabung police-te chuan lui dunga chet lâkna tur kháwl hmang chi lawng (engine boat) an mamawh thu an lo thlen a; rîkrum thila hman tur lirthei ṭha zawk leh SDPO leh thawktu dangte tan quarters an mamawh thu an thlen bawk.

M.Th zirna

Mizoram Baptist Kohhran hnuaia Pathian thu zirna, Academy of Integrated Christian Studies (AICS) chu Senate of Serampore-in M.Th zir theihna turin phalna a pe a, subject pahnih - New Testament leh History of Christianity-te zirtir phawt a ni ang. Kumin June thla aṭang hian zirna thar hi ṭan tum a ni.