MNF leh ZPM-te hi BJP leh RSS-te Mizorama an luhna tur kawngká an ni - Rahul Gandhi
All India Congress Committee (AICC) hruaitu Rahul Gandhi, Lok Sabha MP chuan Mizoram MLA inthlanpui awm tur chu Mizote'n zalên taka sakhua, hnam nunphung leh ṭawng an vawnhim theih dawn leh dawn loh hriltu tur a nih thu leh, MNF leh ZPM chu BJP leh RSS-te Mizorama an luhna tur kawngka an nih thu a sawi.
Rahul Gandhi hian nimin khan Aijal Club-ah thuthar thehdarhtute kâwmin, chanchinbumite'n zawhna an neihte a chháng a; Mizoram Pradesh Congress Committee president Lalsawta'n a ṭawiawm.
Rahul Gandhi chuan, BJP-in engkim an thuhnuaia dah an tum nia sawiin, "Engkim central aṭanga thunun vek an tum a, hei hi Congress party chuan kan duh lo. India ram chhunga sakhaw hrang hrang, hnam hrang hrang leh nunhlui hrang hrangte hi zalen taka awmtir kan duh. Hei hi BJP chuan an duh lo a, an do tlat. BJP do tur hian INDIA invuahin kan intél khawm a, India mipui 60% vel kan nei a, mipui tam zawk kan nei a ni," a ti.
BJP leh RSS-te'n kohhran, ṭawng leh ngaihdan hrang hrangte tihbo a, an thuhnuaia engkim awmtir an tum nia sawiin Rahul-a chuan, "BJP hian Delhi aṭangin a hring a hrànin an awp dawn lo che u, MNF leh ZPM-te hi an rawn luhna leh an thununna tur che u kawngká a ni. MNF chu BJP nen direct-in an thawk dun a, ZPM pawhin BJP an bei ngai lo a, Mizorama RSS ideology luhna tur kawngká an ni," a ti a; an hma lam hun ngaihtuah chiang turin Mizoram mipui a chah.
Rahul Gandhi chuan, MNF leh ZPM an sorkar chuan Mizoramah RSS an lut dawn tih a chiang nia sawiin, "Inthlan lo awm tur hi RSS-in Mizoram an thunun dawn nge dawn lo tih lanna tur a ni," a ti a; Congress party chuan kil tin aṭangin RSS thil tumte an dodal tlat thu a sawi.
BJP thil tum ṭha lo tak an dodal zel dawn thu sawiin Rahul-a chuan, "Congress party hi chu Mizorama BJP an luhna tur a ni ve lo. Inthlan lo awm tur hi Mizote'n in sakhua, in hnam leh nunphung in vawnhim leh vawnhim loh hriltu tur a ni," a ti a, ngaihtuahna uluk taka séng chunga vote thlâk turin Mizoram mipui a sáwm.
Lok Sabha MP chuan, "Congress party-in BJP thil tum kan dodal nasat em avangin ka MP nihna min paihsak a, thubuai 25 min siamsak. Congress party hi hnam tlém zawk leh sakhaw tlém zawkte vénga vawng himtu kan ni. Hei hi thu dik a ni tih hun kal tawhte thlir kîr u la, chiang takin in hmu ang," a ti.
Rahul Gandhi chuan zawhna chhângin, Congress an sorkar chuan Mizoramah tar pension (old age pension) thla tin Rs 2,000 an pek dawn thu a sawi a; eirawngbawlna gas bûr khat 750-in AAY leh PHH card neite leh chhungkaw hotu ber hmeichhiate hnenah an pek dawn thu a puang.
Mizoram inthlanpui awm turah Congress party an chak a beisei dan leh seat lak an beisei zat zawhna chhángin Rahul-a chuan, Congress party dinhmun chu mi tam takin an hre chiang lo a, an dah hniam niin a sawi a, "Congress party hi Mizoramah kan chak ṭha a, inthlanah hian kan chet ṭhat viau ka beisei," a ti.
Rahul Gandhi chuan, Mizo ṭhalai zinga ruihhlo a hluar chhan chu hna thawh tur a awm loh vang a nih thu a dawng tih sawiin, "Ṭhalaite tan kutkawih eizawnna kaltlangin hna kan ngaihtuah dawn a, a tam thei ang ṭhalaite tan hna kan ngaihtuah dawn a ni," a ti bawk.