Belhchian dâwl lo leh rintlak loh hmangin Party pakhatin BJP nen min sawi zawm - ZPM

ZPM Media hruaitute chuan nimin khan Aizawl Press Club-ah thuthar thehdarhtute an kâwm a; political party pakhatin thu belhchian dâwl lo leh rintlak loh hmangin BJP nen an sawizawm thu an sawi.

ZPM Media general secretary Eddy Zosangliana Colney chuan, tunlaiin political party pakhat mangang chalchângin thu belhchian dâwl lo leh rintlak loh tak hmangin mipui rilru hruai kawi an tum a, ZPM leh BJP-te thawh dun tum ang hialin an sawi ṭhin niin a sawi a, "He mite party tho hi ZPM a sorkar hlau a, kan leader Pu Lalduhoma nasa tak bei a, chhungkaw thil pawimawh tia Guwahati-a a zin pawh dâwta puh mualpho duhtute kha an ni," a ti.

ZPM leh BJP sawi zawm luih ṭalh chungchang vawi eng emaw zat an hotute'n an sawifiah tawh thu sawiin Eddy Zosangliana chuan, "Kan hruaitute'n an lo sawi fo tawh angin Mizorama party lian pathum zingah central thu hnuaia kûn ve lo awm chhun kan ni," a ti a; MNF chu BJP hnuaia kûn an nih thu leh Congress party chu an candidate-te Mizoram páwna an hotute pawmpui ngai an nih thu a sawi.

ZPM General Secretary chuan, Congress party chu MNF bei loa ZPM beia, BJP nena an sawi zawm luih chhan chu MLA inthlan turah ZPM chakna hmanga MLA pahnih/pathum neih ve hrâm dan an ngaihtuah vang niin a sawi a, "Indian National Developmental Inclusive Alliana (INDIA) dinnaah Congress hi a meizang hlaptu an ni a, an beisei anga kan tel ve loh avangin BJP nen min sawi zawm lui a ni," a ti.

Eddy Zosangliana Colney chuan, MLA inthlan awm turah thawhpui an nei dawn lo tih sawiin, "Bial 40-a ding tur kan tifel tawh. ZPM hian kan tih theih loh tur kan sawi ngai lo a, kan policy chungchangah mithiam zawkte zau taka ráwn chungin kan kal," a ti a, Mizoram sum dinhmun en chungin an tih theih tur nia an hriat leh an inhuamna chin an sawi ṭhin niin a sawi.

ZPM (independent) MLA pangate'n bànna an thehluh chungchang sawiin ZPM Media hruaitute chuan, "Danin a phût anga MLA aṭanga bànna thehlut an ni. Kum 2018 MLA inthlan dawnah ZPM-in ECI aṭangin party registration an hmuh hman loh avangin ZPM support independent candidate-a dinga tlingte an ni. Kumin inthlanah pawh an bial ngaiah ṭheuh official candidate niin an ding leh vek dawn," an ti.

ZPM Media hruaitute sawi danin, dan ang chuan independent MLA an nih miau avang leh ZPM-in ECI aṭanga registration a neih tawh avang leh ZPM candidate an nih dawn avangin bànna an thehlut a; Assembly speaker Lalrinliana Sailo thuràwn angin bànna an thehlut a ni.

Lalrinliana Sailo-in speaker a nihna leh MLA aṭangin a báng dawn tih ZPM thláwptu MLA pangate a hrilh lâwk tih sawiin ZPM Media hotute chuan, "A chhan chu MNF party rilru puthmang a hriat chian êm avangin speaker aṭanga a bàn hma ngeia MLA aṭanga bànna thehlut turin thuràwn a pe hlawm. Pu Lalrinliana Sailo kha báng hman se chuan MNF-in an bànna tikhawtlaiin, kan MLA-te bànna an pawmsak duh loh a rinawm," an ti.