Thu dik lo sawiah BJP-in Rahul an puh

BJP, Mizoram Pradesh hruaitute chuan nimin khan Aizawl Press Club-ah thuthar thehdarhtute an kâwm a; All India Congress Committee (AICC) hruaitu Rahul Gandhi chu thu dik lo tak tak Mizorama sawiah an puh.

Mizoram BJP thupuangtu Lalremsangi Fanai chuan, India ramah Congress party an sorkar laiin Mizoram a hnufual hle nia sawiin, "Prime minister Modi kaihhruai BJP sorkar hnuaiah kalphung dik hmangin hmalak a ni. Digital India khawvelah kan lut a, chu chuan eirûkna tam tak kawng a khâr ta a, nasa takin India ramin hma a sawn phah," a ti.

Rahul Gandhi-a'n Mizo mipuite chu an sakhuana, an hnam leh nunphungte a chhe ta vek angin a sawi nia sawiin Lalremsangi chuan, "Mizo kan nih angin khatiang tak maia khawvel hriata min han puh duh kha a zahthlak kan ti hle," a ti a, Mizo mipui hmuhsitna lian takah an ngai tih a sawi.

Lalremsangi Fanai chuan, kum 1966-ah Congress sorkar laiin Mizoram chu ram dang ang maiin jet fighter hmanga bomb a nih thu sawiin, "Kha bomb vanga nunau tam takin an tawrhna kha a rapthlak hle. Kha'ng hun kha Mizoram mipui hian kan theihnghilh thei lo a ni," a ti.

Mizoram BJP hruaitute sawi danin, Congress sorkar lai vêkin Mizoram ramri awlsam taka chinfel theih a ni a, mahse, an chingfel lo a, vawiin thlengin Mizoramin ramri buai a neihte chu Congress party vangah an ngai a ni.

Rajasthan state-a Congress sorkarin healthcare scheme-ah cheng nuai 25 an dah thu Rahul Gandhi-a'n a sawi chu a thu chauh a nia sawiin BJP hruaitute chuan, "Healthcare an hman erawh chu PM Health Care Scheme a ni," an ti a, Congress party chu Mizo mipui tham lo hleah an puh a ni.