MPCC-in an candidate turte an puang

Mizoram Pradesh Congress Committee (MPCC) chuan kumin Mizoram inthlanpuia Assembly constituency tina Congress party candidate turte nimin khan Congress Bhavan-ah an puang.

Indian National Congress (INC) candidate turte hi MPCC senior vice president Lal Thanzara'n a puang a, Manifesto 2023 a tlangzarh nghal. Candidate puanna inkhawmah hian MPCC vice president Lalnunmawia Chuaungo leh party hruaitu dangte an tel.

Congress party candidate tur zingah hian MLA ni lai pali bakah, MLA ni tawh ṭhin mi pariat an awm a, mi 24 chu MLA candidate an nih vawi khatna a ni a; hmeichhia pahnih - Vanlalawmpuii Chawngthu leh Meriam L Hrangchal an tel. Inthlan hmasa lama candidate lo ni tawh (MLA la ni lo) pathum an tel bawk.

Lalnunmawia Chuaungo-in manifesto chungchang a sawi zau a, "Congress party hian mi hausa leh khawsa thei sate aia kan ngaih pawimawh zawk mi rethei leh mi hnuaihnung zawkte dinchhuah hi kan duh ber a ni a, mi rethei leh hnuaihnung zawkte bakah, mahni dinchhuahna tur leh ram intodelhna tura hmalak hi kan thupui ber a ni. Dinchhuah tuma ṭang tak tak tan Rs 2,00,000 thlengin ṭang puihna kan pe dawn," a ti.

MPCC Vice President chuan, eirukna tihbo a, tun aia chaka Lokayukta thuam an tum thu sawiin, "CBI-te awlsam zawka koh luh a, hman zung zung theiha awm tura siam kan tum ang," a ti a, lang tlang sorkar din a, sorkar hnathawkin a hun taka hlawh an lak theih an ngaih pawimawh thu a sawi.

Lalnunmawia Chuaungo chuan, Mizoramah health­care system a chhe hle nia sawiin, "Damlo damna atana sum pûkte an awm. Kan sorkar hian mipui sum a batsak tam hle a, hei hi siam­ṭhat ngei kan tum," a ti.

MPCC Vice President chuan, sorkar hnathawk nghet ve lo chhungkaw tan an dam loha awlsam zawka an inenkawl theihna atan pawisa pek hmasak ngai loin, insurance anga kalpuiin inenkawlna tur an pek dawn thu leh, natna khirh vei, sum hlawm tam tak sên ngai damlote tan scheme ṭha tak an ruahman thu a sawi.

Lalnunmawia Chuaungo chuan, ṭhalaite tana hna siam an ngai pawimawh tih sawiin, "India ram leh ram pawn thlenga ṭhalaite'n hna an thawh theihna atan inzirtirna kan buatsaih dawn. Kum 5 chhungin ṭhalai nuai khat tan eizawnna mumal tak an neih theih nan zirtirna ṭha tak pek hman ngei kan tum," a ti.